பூண்டு மற்றும் செம்பருத்தி டீ: டாக்டர் பிரகாஷ் மூர்த்தியின் ஆரோக்கிய ஆலோசனைகள்

பூண்டை சிற்றுண்டியாக சேர்ப்பதன் நன்மைகள்

டாக்டர் பிரகாஷ் மூர்த்தி, பூண்டை தனியாக சாப்பிடுவதன் மூலம் பல நன்மைகளை பெறலாம் என்கிறார். இனிமேல், நீங்கள் சிற்றுண்டி சாப்பிடும் வழக்கத்தை கொண்டிருந்தால், 10 பல் பூண்டு சாப்பிட்டு, உடன் ஒரு கப் செம்பருத்தி டீ குடிக்கலாம் என்று அவர் பரிந்துரைக்கிறார்.

பூண்டில் உள்ள அல்லிசின் (Allicin) இதயத்துக்கு மிகவும் நல்லது. இது மாரடைப்பு வராமல் தடுக்கும் ஆற்றல் கொண்டது. இரத்தத்தில் இருக்கும் கெட்ட கொழுப்பை அகற்றவும் உதவும். மேலும், அல்சைமர் என்னும் நினைவாற்றல் குறைபாடு பிரச்சனையையும் சரி செய்ய இது துணைபுரிகிறது.

பூண்டு எப்படி சாப்பிடுவது?

டாக்டர் பிரகாஷ் மூர்த்தி கூற்றுப்படி, 10 பல் பூண்டை நெருப்பில் சுட்டு, அதன் தோலை உரித்து, பூண்டை மென்று சாப்பிட வேண்டும். பூண்டை அப்படியே பச்சையாக மென்று சாப்பிட்டால் நெஞ்செரிச்சலை ஏற்படுத்தலாம் என்பதால், சுட்டு சாப்பிடுவது நல்லது என்கிறார்.

கேஸ் ஸ்டவ்வில் சுடுவது சிரமமாக இருந்தால், முழு பூண்டை கம்பியில் குத்தி, நெருப்பு தணலில் காட்டி சுட்டுக்கொள்ளலாம். பிறகு அதை பிரித்து சாப்பிடலாம். இந்த எளிமையான முறையை பெற்றோர்கள் பின்பற்றுவதன் மூலம், குழந்தைகளும் இந்த நல்ல பழக்கத்தை கற்றுக்கொள்வார்கள், இது அவர்களது ஆரோக்கியத்திற்கும் நல்லது.

பூண்டு சாப்பிட்ட பிறகு செம்பருத்தி டீ

உங்களுக்கு காஃபி, டீ சாப்பிடும் பழக்கம் இருந்தால், அதை தவிர்த்து செம்பருத்தி டீ குடித்து பழகலாம். இது இதய ஆரோக்கியத்துக்கு அற்புதமான நன்மைகளை அளிக்கும். சுட்ட பூண்டு சாப்பிட்ட பிறகு இந்த செம்பருத்தி டீ குடிப்பது மிகவும் நல்லது என்கிறார் டாக்டர் பிரகாஷ் மூர்த்தி.

செம்பருத்தி டீ ஜீரோ கலோரிகள் கொண்டது. சங்குப்பூ டீ, க்ரீன் டீ போன்ற ஆன்டி ஆக்ஸிடென்ட் டீ வகைகளும் தனக்கு பிடித்தமானது என்று அவர் கூறியுள்ளார். நீங்கள் ஆன்டி ஆக்ஸிடென்ட் கொண்ட டீ வகைகளை விரும்பினால், உங்கள் டயட்டில் சேர்த்துக்கொள்ளலாம்.

பூண்டு சாப்பிட்ட பிறகு செம்பருத்தி டீ குடிப்பது மனதை அமைதியாக வைத்திருக்க உதவும். இது இதயத்துக்கு நல்லது. உயர் இரத்த அழுத்தம், கொலஸ்ட்ரால், இதயப் பிரச்சனைகள் உள்ளவர்கள் என எல்லோருக்குமே ஏற்றது என்றும் டாக்டர் பிரகாஷ்மூர்த்தி இந்த வீடியோவில் தெரிவித்துள்ளார்.

பூண்டில் இருக்கும் சக்தி வாய்ந்த சேர்மங்கள்

பூண்டு எண்ணற்ற மருத்துவ குணங்களை கொண்டுள்ளது. பூண்டை மெல்லும் போது அதில் சல்பர் சேர்மங்கள் (Sulfur compounds) உருவாகின்றன. இதில் அல்லிசின் என்பது நிலையற்ற கலவை, பூண்டை உரித்த பிறகு சிறிது நேரம் மட்டுமே இருக்கும்.

பூண்டிலிருந்து வரும் சல்பர் சேர்மங்கள் செரிமான பாதையிலிருந்து உடலில் நுழைந்து, உடல் முழுவதும் பயணித்து, வலுவான உயிரியல் விளைவுகளை உண்டு செய்கிறது. ஒரு பல் பூண்டு சுமார் 4.5 கலோரிகளை, 0.2 கிராம் புரதம் மற்றும் 1 கிராம் கார்போஹைட்ரேட்டுகளை கொண்டுள்ளது. மாங்கனீசு, வைட்டமின் பி6, வைட்டமின் சி, செலினியம், ஃபைபர் போன்ற பல்வேறு ஊட்டச்சத்துக்களும் சிறிதளவு இதில் உள்ளன.

செம்பருத்தி டீயின் நன்மைகள்

செம்பருத்தி அதிக அளவு ஆக்ஸிஜனேற்றிகள் (Antioxidants) கொண்டது. ஆய்வுகள் செம்பருத்தி தேநீர் சிஸ்டாலிக் மற்றும் டயஸ்டாலிக் இரத்த அழுத்தத்தை குறைக்க கூடும் என்று நிரூபித்துள்ளன. மேலும் சில ஆய்வுகள் இது இரத்த கொழுப்பு அளவை மேம்படுத்த உதவும் என்று கண்டறிந்துள்ளன.

செம்பருத்தியில் பாலிபினால்கள் (Polyphenols) அதிகம் உள்ளன. இவை சக்திவாய்ந்த புற்றுநோய் எதிர்ப்பு பண்புகளைக் கொண்டிருப்பதாக நிரூபிக்கப்பட்ட சேர்மங்கள். மேலும் சில ஆராய்ச்சிகள் செம்பருத்தி பாக்டீரியா தொற்றுகளிலிருந்து பாதுகாக்க உதவும் என்று கண்டறிந்துள்ளன. ஆய்வு ஒன்றில் செம்பருத்தி சாறு, பிடிப்புகள், வாயு மற்றும் வயிற்றுப்போக்கு போன்ற அறிகுறிகளை உண்டு செய்யும் பாக்டீரியாவின் ஈ-கோலி (E-coli) செயல்பாட்டை தடுப்பதாக கண்டறிந்துள்ளது குறிப்பிடத்தக்கது.

பூண்டு சாப்பிடும் போது கவனத்தில் கொள்ள வேண்டியவை

பூண்டு வெறும் வயிற்றில் சாப்பிடுவது நல்லதா என்று பலரும் கேள்வி எழுப்புகிறார்கள். இதை நிரூபிக்க கூடுதல் ஆராய்ச்சிகள் தேவை. எனினும் இதை சிற்றுண்டி போன்று நண்பகல் மற்றும் மாலை வேளையில் சாப்பிடலாம். பூண்டில் இருக்கும் சில நன்மை பயக்கும் சேர்மங்கள் வெப்பத்திறன் கொண்டவை என்பதால் பச்சையாக, பூண்டு நறுக்கி தேனில் சேர்த்து சாப்பிடலாம்.

பூண்டு பாதுகாப்பானது என்றாலும், இரைப்பை உணவு குழாய் ரிஃப்ளக்ஸ் நோய் உள்ளவர்கள் (GERD) மற்றும் இரத்தத்தை மெலிக்கும் மாத்திரைகள் எடுத்துக்கொள்பவர்கள் மருத்துவரின் ஆலோசனையுடன் எடுத்துக்கொள்ளலாம்.