ஆடி மாதத்தின் சிறப்பு, கூழ் ஊற்றுவதன் பின்னணி மற்றும் பலன்கள்

ஆடி மாதம் கூழ் ஊற்றுவது ஏன்? பின்னணி மற்றும் பலன்கள்

ஆடி மாதத்தில் அம்மன் கோவில்களில் கூழ் ஊற்றும் திருவிழா சிறப்பாக நடைபெறுவதுண்டு. இதற்குப் பின்னால் ஒரு பக்திமிகு வரலாறு உள்ளது.

தவத்தில் சிறந்து விளங்கிய ஜமத்கனி முனிவரை பொறாமை காரணமாக கார்த்த வீரியார்சுனனின் மகன்கள் கொன்று விடுகின்றனர். இதை கேள்விப்பட்டு துக்கம் தாங்க முடியாமல் ஜமத்கனி முனிவரின் மனைவி ரேணுகாதேவி உயிரை விட முடிவு செய்து தீயை மூட்டி அதில் இறங்குகிறார். இந்திரன், வருணனிடம் கூறி மழையை பெய்ய செய்து, தீயை அணைத்தார். தீக்காயங்களால் ரேணுகா தேவியின் உடலில் கொப்பளங்கள் ஏற்பட்டன. வெற்றுடலை மறைக்க அருகில் இருந்த வேப்பமர இலைகளை பறித்து ஆடையாக அணிந்தார்.

ரேணுகா தேவிக்கு பசி ஏற்பட்டதால் அருகில் உள்ள கிராம மக்களிடம் சென்று உணவு கேட்டார். அப்போது மக்கள் அவருக்கு பச்சரிசி, வெல்லம், இளநீரை உணவாக கொடுத்தனர். இதைக் கொண்டு ரேணுகாதேவி கூழ் தயாரித்து உணவுண்டார். அப்போது சிவபெருமான் தோன்றி ரேணுகா தேவியிடம், உலக மக்களின் அம்மை நோய் நீங்க நீ அணிந்த வேப்பிலை சிறந்த மருந்தாகும். நீ உண்ட கூழ் சிறந்த உணவாகும். இளநீர் சிறந்த நீராகாரமாகும் என்று வரம் அளித்தார்.

இச்சம்பவத்தை நினைவு கூறும் வகையிலும், ரேணுகா தேவியின் பெருமைகளை அனைவரும் அறியும் படி செய்வதற்காகவும் ஆடி மாதத்தில் அம்மன் கோவில்களில் கூழ் வார்க்கும் திருவிழா சிறப்பாக நடைபெற்று வருகிறது. இது தமிழ் கலாச்சாரத்தின் ஒரு முக்கிய அங்கமாகும்.

மேலும், ஆடி மாதத்தில் வீசக்கூடிய காற்றின் வேகம் அதிகமாக இருக்கும். இதனால் எங்கும் தூசியாக இருக்கும். இதன் காரணமாக காய்ச்சல், இருமல் போன்ற நோய்கள் வரலாம். இதை தவிர்க்கவே மாரியம்மன் கோவில்களில் ஆடி மாதம் முழுவதும் கூழ் ஊற்றுவார்கள். இதை "ஆடிக்கஞ்சி" என்பர். இதில் வேப்பிலை கலந்து தருவதால், இது அம்மனின் அருள் பிரசாதமாகவும், நோய்களைத் தீர்க்கும் சிறந்த மருந்தாகவும் மக்கள் கருதி கொண்டாடுகிறார்கள். நோய்களைத் தீர்த்து, பூமியை செழிக்க வைக்கும் தெய்வமாக ரேணுகாதேவியையே மாரியம்மன் என்ற பெயரில் மக்கள் வழிபடுகிறார்கள்.