விநாயகர்: முழுமுதற் கடவுள் ஏன்?

விநாயகர் வழிபாட்டின் சிறப்பு

எந்த தெய்வத்தை வழிபடுவதாக இருந்தாலும், எந்த காரியத்தை துவங்குவதாக இருந்தாலும் முதலில் விநாயகரை தான் வழிபடுகிறோம். முதலில் விநாயகரை வழிபட்டு விட்டு துவங்கினால் தான் அந்த வழிபாடு முழுமை பெறும் என்கிறார்கள். மற்ற எந்த தெய்வத்திற்கும் இல்லாமல் விநாயகருக்கு மட்டும் ஏன் இந்த சிறப்பு? இவரை மட்டும் ஏன் முழு முதற் கடவுள் என்கிறோம்? தமிழ் கலாச்சாரத்தில் முருகன் ஆலயங்கள் போன்று விநாயகர் ஆலயங்களும் மிக முக்கியத்துவம் வாய்ந்தவை.

தத்துவங்கள் தோன்றும் முறையில் முதற்கண் சுத்தமாயையில் இருந்து `ஓம்` என்ற பிரணவ நாதமே தோன்றியது. பிள்ளையார் பிரணவ வடிவானவர். அதனால் `பிரணவன்' என்றும், `மூத்த பிள்ளையார்' என்றும் அறியப்படுகின்றார். 'ஓங்கார நாத தத்துவம்` சிவனையும் சுட்டி நிற்பதால் சிவனும், பிள்ளையாரும் ஒன்றே என்றும் கொள்ள முடிகின்றது. பிரணவத்தை முற்றறிந்தவர் என்பதால் பிரணவன், பிரணவநாதன் என்றெல்லாம் அழைக்கப்படுகின்றார், விநாயகப் பெருமான்.

விநாயகரின் திருமேனி வர்ணனை

விநாயகரின் வலது முன்கை அபய முத்திரையக் காட்டும், வலது பின்கையில் மழுவாயுதமும், இடது முன்கையில் மோதகம் அல்லது மாதுளம்பழம் வைத்திருப்பது போலவும், இடது பின்கையில் பாசக் கயிறோ அல்லது செந்தாமரை மலரோ கொண்டிருப்பது போலவும் சித்தரிக்கப்படுகின்றது. துதிக்கையில் நீர்க் கலசம் ஜகமண்டலம் ஒன்றை ஏந்தியிருப்பார்.

பிள்ளையார் சுழியின் மகத்துவம்

உலகிலுள்ள சைவ மக்கள் எதையாவது எழுதத் தொடங்கும் பொழுதும், எழுதும் தாளின் தலைப்பில் முதலாவதாக பிள்ளையார் சுழி எழுதிய பின்னரே விஷயத்தை எழுதத் தொடங்குவர். பிள்ளையார் சுழி `உ' என்ற எழுத்தும் ஒரு கோடும் இணைந்து இருக்கும். இதற்கு ஒரு தத்துவம் உண்டு, புஜ்ஜியமான வட்டத்தை "0" பிந்து என்றும், தொடர்ந்து வரும் கோட்டை நாதம் என்றும் கொள்கின்றனர். எனவே பிள்ளையார் சுழியை `நாத பிந்து' என்பர். பிள்ளையாருடன் சிவசக்தியின் இணைப்பை இது உணர்த்துவதாக உள்ளதெனக் கூறப்படுகின்றது.

எந்த ஒரு காரியத்தையும் ஆரம்பிப்பதற்கு முன்னர் பிள்ளையாரை வழிபட்ட பின்னரே ஆரம்பிக்கும் வழக்கம் மக்களிடையே காலம் காலமாக இருந்து வருகின்றது. அவரை வழிபட்டுத் தொடங்கினால் செய்யும் செயல்களில் எந்த வித தடைகளும் இன்றி நிறைவுபெறும் என்பது இந்துக்களின் நம்பிக்கை. இந்த விநாயகர் வழிபாடு ஜோதிடத்தில் நல்வாழ்வுக்கு வழி வகுக்கும்.