கறைபடிந்த பற்களுக்கு வீட்டு வைத்தியம்!

வெதுவெதுப்பான நீர் கொண்டு வாய் கொப்பளிக்கும் முறை

பற்களின் கறையை நீக்குவதோடு மட்டுமல்லாமல், புதிய கறைகள் படிவதைத் தவிர்க்கவும் தினமும் சாப்பிட்ட பிறகு சூடான நீரில் வாய் கொப்பளிப்பது அவசியம். இது பற்களின் இடுக்குகளில் தேங்கியுள்ள உணவுத் துகள்களை வெளியேற்றி, தொற்றுக்கிருமிகள் உருவாவதைத் தடுக்கும். இதனால் பற்கள் மற்றும் நாக்கு இரண்டும் சுத்தமாக இருக்கும்.

பல் கறை நீக்க படிகாரம் (Alum) பயன்படுத்தும் முறை

நாட்டு மருந்து கடைகளில் கிடைக்கும் படிகாரத்தை (அல்லது படிகார பஸ்பம்) வாங்கி, அதை உடைத்து பொடியாக்கி, எலுமிச்சை சாறுடன் நீர்த்து சேர்த்து குழைத்துக் கொள்ளவும். இந்தக் கலவையை பற்களின் மேல் பிரஷ் கொண்டு தடவி வந்தால் கறைகள் நீங்கும். தினமும் காலை மற்றும் மாலை என இரு வேளைகளிலும் கறைகள் நீங்கும் வரை செய்யலாம். இது பல் கறைகளை நீக்கும் ஒரு சிறந்த வீட்டு வைத்தியம் ஆகும்.

வாய் துர்நாற்றத்திற்கு படிகார மவுத் வாஷ்

படிகாரம் ஒரு இயற்கையான மவுத் வாஷ் ஆகப் பயன்படுத்தப்படுகிறது. ஈறுகளில் வலி, பல் வலி, மற்றும் வாய் துர்நாற்றம் போன்ற பிரச்சனைகளுக்கு, தண்ணீரில் படிகாரம் கலந்து வாய் கொப்பளிக்கலாம். வாய் முழுவதும் இந்த நீர் படும்படி சில வினாடிகள் வைத்திருந்து கொப்பளிப்பது, வாய் வலியை குறைத்து புத்துணர்ச்சியுடன் வைத்திருக்க உதவும்.

படிகாரம் குறித்து ஆய்வு சொல்வது என்ன?

படிகாரம் வாய் துர்நாற்றம் மற்றும் பற்களின் வெண்மைக்கு பயன்படுத்தும் நிலையில் இதன் நன்மை தீமை குறித்து ஆய்வு மேற்கொள்ளப்பட்டது. 9-12 வயதுக்குட்பட்ட ஆரோக்கியமான 60 குழந்தைகளை மூன்று குழுக்களாகப் பிரித்து, ஒரு மாத காலம் படிகாரம், உப்பு, மற்றும் மூலிகை மவுத் வாஷ் பயன்படுத்தப்பட்டது. படிகாரம் பயன்படுத்திய குழுவில் குறிப்பிடத்தக்க முறையில் பல் கறைகள் குறைந்திருப்பது கண்டறியப்பட்டது. எனினும், இது குறித்து மேலும் ஆய்வுகள் தேவை.

படிகாரம் மற்றும் எலுமிச்சை பயன்பாட்டில் எச்சரிக்கை

எலுமிச்சையின் அமிலத்தன்மை பற்களின் பற்சிப்பியை பாதிக்கலாம் மற்றும் உணர்திறனை ஏற்படுத்தலாம். இதை நீண்ட காலம் பயன்படுத்தும் போது பற்களுக்கு ஆபத்தை உண்டு செய்யலாம். மிதமான பயன்பாட்டிற்கு மருத்துவரை கலந்து ஆலோசிப்பது பாதுகாப்பானது. பல் பராமரிப்பு மற்றும் கறைகளைத் தவிர்ப்பதற்கு ஆறு மாதங்களுக்கு ஒருமுறை பல் மருத்துவரை சந்திப்பது அவசியம்.

பொறுப்பு துறப்பு: இந்த கட்டுரையில் வழங்கப்பட்டுள்ள தகவல்கள் பொதுவான நோக்கங்களுக்காக மட்டுமே. இது மருத்துவ ஆலோசனை, நோயறிதல் அல்லது சிகிச்சைக்கு மாற்றாக இல்லை. மேலும் விவரங்களுக்கு எப்போதும் மருத்துவரை அணுகவும்.