கருவுறுதல் சிகிச்சையில் இருக்கும் பெண்கள் எதிர்கொள்ளும் இனப்பெருக்க அமைப்பு பிரச்சனைகளுக்கு பல பாரம்பரிய ஆயுர்வேத மூலிகைகள் தீர்வாக உள்ளன. டாக்டர். ஜி.கே. தாரா ஜெயஸ்ரீ MD(Ayu), தி ஆர்யா வைத்யா சிகிக்சாலயம் மற்றும் ஆராய்ச்சி நிறுவனம், கோயம்புத்தூர், சதாவரி, அசோகா, தசமூலா, லோத்ரா, குடுச்சி, லைகோரைஸ் போன்ற மூலிகைகள் பெண்களின் இனப்பெருக்க மண்டலத்திற்கு எவ்வாறு உதவுகின்றன மற்றும் அவற்றின் நன்மைகள் என்ன என்பதை இங்கு விரிவாக விளக்குகிறார்.
சதாவரி (Shatavari)
சதாவரி இனிப்பு மற்றும் கசப்பு இரண்டு சுவைகளையும் கொண்டுள்ளது. இதன் குணங்கள் கனமானது மற்றும் குளிர்ந்த தன்மை கொண்டது. இது பெண்களின் கருப்பைக்கு ஒரு டானிக் ஆக செயல்படுகிறது. சதாவரி இனப்பெருக்க திசுக்களுக்கு ஊட்டமளித்து, ஹார்மோன் சமநிலையை ஆதரிக்கிறது. இதனால் ஒழுங்கற்ற மாதவிடாய் சுழற்சிகள், குறைந்த லிபிடோ, பிசிஓஎஸ், மற்றும் மலட்டுத்தன்மை போன்றவற்றுக்கு சிகிச்சையளிக்கப் பயன்படுகிறது. குறிப்பாக வறட்சி, பதட்டம் அல்லது மாதவிடாய் ஒழுங்கற்ற சுழற்சி உள்ள பெண்களுக்கு இது வாத, பித்த ஏற்றத்தாழ்வுகளை சமன் செய்கிறது.
அசோகா (Ashoka)
அசோக மரப்பட்டை கருப்பையை வலுப்படுத்துவதில் புகழ்பெற்றது. இது துவர்ப்புத்தன்மை, இலேசானது, உலர்தன்மை மற்றும் குளிர்ச்சியான பண்புகளை கொண்டது. மாதவிடாய் சுழற்சியை ஒழுங்குபடுத்துகிறது. மாதவிடாய் நிறுத்தம், டிஸ்மெனோரியா மற்றும் பிசிஓஎஸ் போன்ற நிலைகளை குணப்படுத்துகிறது. அசோகா கருப்பை தசைகள் மற்றும் எண்டோமெட்ரியல் புறணியை வலுப்படுத்தும் தன்மையைக் கொண்டுள்ளது. அதிக இரத்தப்போக்குடன் கூடிய பித்த ஏற்றத்தாழ்வுகள் மற்றும் அழற்சி கொண்ட இனப்பெருக்க நோய்களில் இது முக்கிய பங்கு வகிக்கிறது.
லோத்ரா (Lodhra)
லோத்ரா என்னும் தாவரத்தின் வேர்கள், பட்டை மற்றும் இலைகள் எல்லாமே மருத்துவ குணங்களை கொண்டுள்ளன. இது துவர்ப்புதன்மை கொண்டது. இலேசானது. உலர் தன்மை கொண்டது. உடலில் உஷ்ணத்தன்மையை ஏற்படுத்தும். லோத்ரா இனப்பெருக்க உறுப்புகளின் அழற்சியைக் குறைக்கிறது. கருப்பை சுத்திகரிப்பு மற்றும் அதிகப்படியான வெளியேற்றத்தை சரி செய்ய இவை உதவுகிறது. பெரும்பாலும் வெள்ளைப்படுதல், பிசிஓஎஸ், நார்த்திசுக்கட்டிகள் சிகிச்சையில் இவை பயன்படுத்தப்படுகிறது. கருப்பையின் கபம்- பித்த கோளாறுகளுக்கு இவை சிகிச்சை அளிக்கப்படுகிறது.
தசமூலம் (Dashamoola)
தசமூலம் என்பது பத்து மூலிகைகளின் கலவை ஆகும். இது கசப்பு, துவர்ப்பு சுவை கொண்டவை. இலேசானவை, உலர்ந்த தன்மை கொண்டவை, உஷ்ணத்தன்மை அளிக்கும். இது ஆழ்ந்த அழற்சி எதிர்ப்பு, நாள்பட்ட இடுப்பு வலி மற்றும் கருப்பை ஆரோக்கியத்துக்கு ஏற்றது. இனப்பெருக்கம் மற்றும் வெளியேற்ற செயல்பாடுகளை நிர்வகிக்க செய்கிறது. இது அபனா வாத்தை புத்துயிர் பெற செய்கிறது. மாதவிடாய் மற்றும் கருத்தரிப்பை பாதிக்கும் வாத கோளாறுகள் பிரச்சனை இருக்கும் பெண்களுக்கு இந்த தசமூலம் சிறந்த சிகிச்சையாக இருக்கும்.
குடுச்சி (Guduchi)
குடுச்சி, சீந்தில் என்றும் அழைக்கப்படுகிறது. இது கசப்பு தன்மை கொண்டது. இது இலேசானது, உடலில் உஷ்ணத்தன்மையை கொடுக்கும். வளர்சிதை மாற்ற செயல்பாடுகளில் உணவுக்கு பின்பு இனிப்பு செயல்களை கொண்டுள்ளது. குடுச்சி இம்யூனோமோடூலேட்டர் ஆக செயல்பட்டு கருத்தரிப்பில் தலையிடக்கூடிய தன்னுடல் தாக்க காரணிகளை குறைக்கிறது. இனப்பெருக்க சேனல்களை தடுக்கும் நச்சுக்களை குறைக்கிறது. உடலில் வாதம், பித்தம், கபம் மூன்று தோஷங்களையும் சமநிலைப்படுத்துகிறது. ஆட்டோ இம்யூன் கோளாறுகள், நாள்பட்ட தொற்றுகள், வீக்கம் போன்றவற்றுக்கு சிகிச்சையளிக்க உதவுகின்றன.
அதிமதுரம் (Licorice)
அதிமதுரம் இனிப்பு குணம் கொண்டது. கனமான குணம் கொண்டது. குளிர்ச்சியூட்டும் தன்மை கொண்டது. அதிமதுரம் அட்ரீனல் செயல்பாடுகளை ஆதரிக்கிறது. மன அழுத்தத்தால் தூண்டப்பட்ட ஹார்மோன் ஏற்றத்தாழ்வு பிரச்சனையை சரி செய்கிறது. கர்ப்பப்பை வாய் சளியை மேம்படுத்துகிறது. எண்டோமெட்ரியத்தை அமைதிப்படுத்துகிறது. இயற்கையான ஈஸ்ட்ரோஜன் மாடுலேட்டராக இது செயல்படுகிறது. கபம், வாதம், பித்தம் ஏற்றத்தாழ்வு, மலட்டுத்தன்மை, குறைந்த கர்ப்பப்பை வாய் சளி, சோர்வு, மன அழுத்தம் போன்றவற்றை உண்டு செய்யும். அதை குறைக்க இந்த மூலிகை உதவும்.
முக்கிய ஆயுர்வேத மூலிகைகளின் நன்மைகள்:
- சதாவரி: ஹார்மோன் சமநிலை, இனப்பெருக்க திசுக்களுக்கு ஊட்டமளித்தல், மாதவிடாய் ஒழுங்கின்மை சரிசெய்தல்.
- அசோகா: கருப்பையை வலுப்படுத்துதல், மாதவிடாய் சுழற்சி ஒழுங்குபடுத்துதல், பிசிஓஎஸ் சிகிச்சை.
- லோத்ரா: இனப்பெருக்க உறுப்புகளின் அழற்சியைக் குறைத்தல், கருப்பை சுத்திகரிப்பு, வெள்ளைப்படுதல் சரிசெய்தல்.
- தசமூலம்: ஆழ்ந்த அழற்சி எதிர்ப்பு, நாள்பட்ட இடுப்பு வலி நிவாரணம், கருப்பை ஆரோக்கியம்.
- குடுச்சி: நோய் எதிர்ப்பு சக்தியை மேம்படுத்துதல், நச்சுக்களை நீக்குதல், தோஷங்களை சமநிலைப்படுத்துதல்.
- அதிமதுரம்: அட்ரீனல் செயல்பாடுகளை ஆதரித்தல், ஹார்மோன் ஏற்றத்தாழ்வுகளை சரிசெய்தல், மன அழுத்தத்தை குறைத்தல்.
ஆயுர்வேத மூலிகைகளை எடுக்கும் முறை மற்றும் எச்சரிக்கை:
நீங்கள் கருவுறாமை சிகிச்சையில் இருந்தால், இந்த மூலிகைகளை எடுத்துக்கொள்வதற்கு முன் உங்கள் மருத்துவரிடம் ஆலோசனை பெறுவது அவசியம். இந்த மூலிகைகள் உங்கள் தற்போதைய மருந்துகளுடன் தலையிடுமா என்பதை அறிந்துகொள்ள வேண்டும். எந்தெந்த மூலிகைகள், எப்போது, எப்படி, எவ்வளவு காலம் எடுத்துக்கொள்ள வேண்டும் போன்ற தகவல்களை ஆயுர்வேத மருத்துவ நிபுணரிடம் கேட்டு அதன்படி எடுத்துக்கொள்வது மட்டுமே பாதுகாப்பானது மற்றும் பயனுள்ளது.