எந்த ஒரு புதிய காரியத்தையும் துவங்கும் முன், முழுமுதற் கடவுளான விநாயகப் பெருமானை வழிபடுவது ஏன்? அவருடைய பிரணவ வடிவத்தின் ரகசியங்கள் என்ன? விநாயகரின் திருமேனி உணர்த்தும் ஆழமான தத்துவங்கள் பற்றி இந்த கட்டுரையில் விரிவாக அறிவோம். ஜோதிட ரீதியாகவும், ஆன்மிக ரீதியாகவும் விநாயகர் வழிபாட்டின் முக்கியத்துவத்தையும், தடைகளை நீக்கி அருளும் அவரது சக்தியையும் அறிந்து, உங்கள் வாழ்வில் நலன்களைப் பெறுங்கள்.
விநாயகர் ஏன் முழுமுதற் கடவுள்? பிரணவ தத்துவம்
எந்த ஒரு தெய்வத்தை வழிபடுவதாக இருந்தாலும், எந்த காரியத்தை துவங்குவதாக இருந்தாலும் முதலில் விநாயகரைத் தான் வழிபடுகிறோம். முதலில் விநாயகரை வழிபட்டு விட்டு துவங்கினால் தான் அந்த வழிபாடு முழுமை பெறும் என்கிறார்கள். மற்ற எந்த தெய்வத்திற்கும் இல்லாமல் விநாயகருக்கு மட்டும் ஏன் இந்த சிறப்பு? இவரை மட்டும் ஏன் முழுமுதற் கடவுள் என்கிறோம்?
தத்துவங்கள் தோன்றும் முறையில் முதற்கண் சுத்தமாயையில் இருந்து `ஓம்` என்ற பிரணவ நாதமே தோன்றியது. பிள்ளையார் பிரணவ வடிவானவர். அதனால் `பிரணவன்' என்றும், `மூத்த பிள்ளையார்' என்றும் அறியப்படுகின்றார். 'ஓங்கார நாத தத்துவம்` சிவனையும் சுட்டி நிற்பதால் சிவனும், பிள்ளையாரும் ஒன்றே என்றும் கொள்ள முடிகின்றது. பிரணவத்தை முற்றறிந்தவர் என்பதால் பிரணவன், பிரணவநாதன் என்றெல்லாம் அழைக்கப்படுகின்றார், விநாயகப் பெருமான்.
ஓம் என்ற பிரணவ மந்திர ரூபியான அவர் ஞானமே வடிவானவர். அவருடைய திருமேனியை ஒரு தத்துவ வித்தென ஆன்றோர் உருவகப்படுத்தி உள்ளனர். இதுவே அவரது ஜோதிட மற்றும் ஆன்மிக முக்கியத்துவத்தை உணர்த்துகிறது.
விநாயகர் திருமேனியின் தத்துவ ரகசியங்கள்
விநாயகப் பெருமானின் திருமேனியின் ஒவ்வொரு பகுதியும் ஆழமான தத்துவங்களை உணர்த்துகிறது:
- திருவடிகள்: அவருடைய இரு திருவடிகளிலே வலது திருவடியை "முற்றறிவு'', அதாவது `ஞான சக்தி' என்றும், இடது திருவடியை "முற்றுத் தொழில்'' அதாவது `கிரியாசக்தி' என்றும் உணர்த்தப்படுகின்றது. அவ்விரு திருவடிகளின் துணையின்றி உயிர்கள் ஒன்றினை அறிந்து கொள்ளவோ, செயலாற்றவோ முடியாது.
- பரந்த ஆகாய வடிவம்: எல்லா பொருட்களையும் தன்னுள் அடக்கவும், உண்டாக்கவும், விரிக்கவும், ஒடுக்கவும் கூடிய தன்மையைக் கொண்ட பரந்து விரிந்ததொரு பூதம் தான் ஆகாயம். ஆகாயம் போல் அனைத்து பொருட்களையும் தனக்குள் உள்ளடக்கியவராகவும், அனைத்து பொருட்களிலும் திகழ்பவராக இருப்பவர் விநாயகப் பெருமான். இது சிவ பெருமானுக்கும் உரிய தன்மை ஆகும்.
ஐங்கரனின் பஞ்ச கிருத்தியங்கள்
படைத்தல், காத்தல், அழித்தல், அருளல், மறைத்தல் ஆகிய பஞ்ச கிருத்தியங்களையும் அவர் தனது ஐந்து கரங்களால் இயற்றுகின்றார் எனப்படுகின்றது. ஐந்து கருமங்களுக்கும் அவரே அதிபதி என்பதனால் அவருக்கு `ஐங்கரன்' என்ற நாமம் விளங்குகின்றது. அவரை `பஞ்ச கிருத்திகள்' என்றும் கூறுவர்.
- செவிகள்: அவரது முற்றறிந்த ஞானத்தை முறம் போன்று பரந்து விரிந்த இரு செவிகளும் விளக்குகின்றன.
- ஒடிந்த கொம்பு: வலது பக்கமுள்ள ஒடிந்த கொம்பு "பாச ஞானத்தையும்`, இடது பக்கமுள்ள கொம்பு "பதிஞானத்தையும்` உணர்த்துவதாக உள்ளன.
விநாயகரின் மூஷிகம், நாகாபரணம் மற்றும் முக்கண்
- மூஷிகம் (பெருச்சாளி): விநாயகரின் அடிக்கீழ் மூஷிகம் அழுந்தி அமைதியாகக் காணப்படுவதை, பிரணவ மூர்த்தியின் அடிக்கீழ் ஆணவ மலம் வலிகெட்டு அமைதி காக்கும் என்பதை விளக்குகின்றது.
- நாகாபரணம் (சர்ப்பம்): அவரது உந்தியைச் சுற்றியுள்ள சர்ப்பம் `குண்டலினி சக்தியின்' வடிவம் என்பர். அதன் விரிவுகளும், சுருக்கங்களுமே பிரபஞ்சத்தின் தோற்றம், சுருக்கம் எனப்படுகின்றது. அதை விநாயகர் உந்தியில் அணிந்திருப்பதானது, உலகிற்கு நிமித்த காரணர் அவர் தாம் என்பதையும் உணர்த்துகின்றது.
- முக்கண்: மேலும் விநாயகர் முக்கண் உடையவரெனவும் விளக்கப்பட்டுள்ளது. முக்கண்ணுடைய பெருமை சிவனுக்கே உரியது. ஆயினும் கிரியா வழி, ரூப வழி அடிப்படையில் பார்த்தால் சிவனும் பிள்ளையாரும் ஒன்றே எனும் தத்துவத்தை உணர்ந்து கொள்ளலாம்.
சித்தி, புத்தி மற்றும் விநாயகரின் உருவ அமைப்பு
மேலும், விநாயகருக்கு `சித்தி', `புத்தி' என இரு சக்திகள் உள்ளதாகவும் புராணங்களில் பேசப்படுகின்றது. விநாயகரின் வலது முன்கை அபய முத்திரையக் காட்டும், வலது பின்கையில் மழுவாயுதமும், இடது முன்கையில் மோதகம் அல்லது மாதுளம்பழம் வைத்திருப்பது போலவும், இடது பின்கையில் பாசக் கயிறோ அல்லது செந்தாமரை மலரோ கொண்டிருப்பது போலவும் சித்தரிக்கப்படுகின்றது. துதிக்கையில் நீர்க் கலசம் ஜகமண்டலம் ஒன்றை ஏந்தியிருப்பார்.
பிள்ளையார் சுழி: நாத பிந்து தத்துவம்
உலகிலுள்ள சைவ மக்கள் எதையாவது எழுதத் தொடங்கும் பொழுதும், எழுதும் தாளின் தலைப்பில் முதலாவதாக பிள்ளையார் சுழி எழுதிய பின்னரே விஷயத்தை எழுதத் தொடங்குவர். பிள்ளையார் சுழி `உ' என்ற எழுத்தும் ஒரு கோடும் இணந்து இருக்கும். இதற்கு ஒரு தத்துவம் உண்டு, புஜ்ஜியமான வட்டத்தை "0" பிந்து என்றும், தொடர்ந்து வரும் கோட்டை நாதம் என்றும் கொள்கின்றனர். எனவே பிள்ளையார் சுழியை `நாத பிந்து' என்பர். பிள்ளையாருடன் சிவசக்தியின் இணைப்பை இது உணர்த்துவதாக உள்ளதெனக் கூறப்படுகின்றது.
எந்த ஒரு காரியத்தையும் ஆரம்பிப்பதற்கு முன்னர் பிள்ளையாரை வழிபட்ட பின்னரே ஆரம்பிக்கும் வழக்கம் மக்களிடையே காலம் காலமாக இருந்து வருகிறது. அவரை வழிபட்டுத் தொடங்கினால் செய்யும் செயல்களில் எந்த வித தடைகளும் இன்றி நிறைவுபெறும் என்பது இந்துக்களின் நம்பிக்கை. இந்த தமிழ் பாரம்பரியம் நம் கலாச்சாரத்தின் ஆழமான ஒரு அங்கம்.
விநாயகர் வழிபாட்டின் முக்கியத்துவங்கள்
- முழுமுதற் கடவுள்: விநாயகர், அனைத்து தெய்வங்களுக்கும் முதற்கடவுளாகப் போற்றப்படுகிறார்.
- பிரணவ வடிவம்: 'ஓம்' என்ற பிரணவ மந்திரத்தின் வடிவமாக திகழ்கிறார், அனைத்து ஒலி மற்றும் பிரபஞ்சத்தின் தொடக்கத்தை குறிக்கிறது.
- ஞான சக்தி & கிரியா சக்தி: அவரது திருவடிகள் முறையே முற்றறிவு மற்றும் முற்றுத் தொழிலின் அடையாளமாக உள்ளன.
- பஞ்ச கிருத்தியங்கள்: படைத்தல், காத்தல், அழித்தல், அருளல், மறைத்தல் ஆகிய ஐந்து செயல்களையும் தனது ஐந்து கரங்களால் செய்கிறார்.
- தடைகளை நீக்கும் வல்லமை: விநாயகரை வழிபடுவதன் மூலம் காரியங்களில் ஏற்படும் தடைகள் நீங்கி வெற்றி கிடைக்கும் என்பது அசைக்க முடியாத நம்பிக்கை.
- ஜோதிட ரீதியான பலன்கள்: விநாயகர் வழிபாடு ஜோதிட ரீதியாகவும் பல நல்ல பலன்களை அளிக்கும்.