விநாயகர் வழிபாடு: தத்துவம், பலன்கள் மற்றும் முக்கியத்துவம்

விநாயகர் மற்றும் கணபதி பெயர்களின் பொருள்

“வி” எனும் எழுத்துக்கு இல்லாமை எனப் பொருள். “நாயகன்” எனும் சொல்லுக்கு தலைவன் என அர்த்தம். தனக்கு மேல் ஒரு தலைவன் இல்லை என்பதே விநாயகர் என்பதன் பொருள். அதேபோல், கணங்களுக்கு எல்லாம் பதி, அதாவது தலைவர் என்பதால் கணபதி என்று அழைக்கப்படுகிறார். இவர் அனைத்து தெய்வங்களுக்கும் அதிபதி என்பதையும், தடைகளை நீக்குபவர் என்பதையும் இந்த பெயர்கள் உணர்த்துகின்றன.

விநாயகப் பெருமானின் திருவுருவத் தத்துவம்

யானை தலை, கழுத்துக்குக் கீழே தேவ உடல், மிகப்பெரிய தொந்தி, நான்கு கைகள், வளைந்த துதிக்கை, கையில் மோதகம், பாசம், அங்குசம், இந்தப் பெரிய உருவத்தை தாங்கும் சிறிய வாகனமாக மூஞ்சுறு - இப்படியான ஒரு கலவைதான் விநாயகப் பெருமானின் திருவுருவம். இந்த உடலமைப்பு உலகின் அனைத்து உயிர்களிலும் தாம் கலந்து இருக்கும் தத்துவத்தைக் குறிக்கிறது. படைத்தல் தொழிலை பாசம் ஏந்திய திருக்கரமும், அழித்தலை அங்குசம் ஏந்திய திருக்கரமும், அருளை மோதகம் ஏந்திய திருக்கரமும், மறைத்தலை தும்பிக்கையும் குறிக்கின்றன. மொத்தத்தில், "ஓம்" எனும் தத்துவப் பொருளின் அடையாளமாகவே விநாயகப் பெருமான் விளங்குகிறார். ஆகவேதான், "ஓம் பிரணவானன தேவாய நம" என்பது கணபதியின் மந்திரங்களில் ஒன்றாக விளங்குகிறது. சூரியன், சந்திரன், அக்னி ஆகியவை கண நாதன் கணபதியின் மூன்று கண்களாகத் திகழ்கின்றன. பக்தர்களின் குறைகள் ஒன்று விடாமல் விரிவாகக் கேட்டு நிவர்த்திக்க வேண்டும் என்பதற்காகவே அகண்ட பெரிய செவிகள். அண்டங்களை எல்லாம் தம்முள் அடக்கியவர் விநாயகப் பெருமான் என்பதை இவரது பெருத்த வயிறு குறிக்கிறது. இவரது திருப்பாதங்கள் பக்தர்கள் வாழ்வுக்கு நல்வழி காட்டும் என விளக்கும் தத்துவப் பொருளாகவே கணபதியின் திருவுருவம் விளங்குகிறது. ஜோதிட ரீதியாகவும், விநாயகர் வழிபாடு சர்வ சங்கடங்களையும் நீக்கும் வல்லமை படைத்தது.

களிமண் விநாயகர் வழிபாட்டின் முக்கியத்துவம்

விநாயகர் சதுர்த்தி வழிபாடும், விநாயகர் வழிபாடும் ஒவ்வொருவரும் செய்வது அவசியமானது. அனைவரும் அவர்களது வீட்டில் சிறிய மண் விநாயகர் சிலையை வைத்து வழிபட்டு மூன்று அல்லது 5 நாட்கள் கழித்து அதை நீர் நிலைகள், ஆறு, கடலில் கரைப்பது நல்லது. மண் என்பது உலக உயிர்களின் வாழ்க்கையுடன் ஒன்றுபட்ட ஒன்றாகும். அதிலும் களிமண் எளிதில் கரையக்கூடியதாகும். அதே போல் விநாயகப் பெருமானின் மனமும் எளிதில் கரையும் தன்மை கொண்டது. அவரை வழிபட்டால் நம்முடைய துன்பங்களும் எளிதாக கரைந்து விடும் என்பதை உணர்த்தவே களிமண் விநாயகரை வைத்து வழிபடுகிறோம். களி மண்ணால் செய்யப்பட்ட புதிய விநாயகர் சிலையை வாங்கி வந்து, வீட்டில் வைத்து, மந்திரங்கள் சொல்லி பூஜை செய்யும் போது அதில் விநாயகர் எழுந்தருள்வார். பூஜையின் நிறைவில் நாம் முன் வைக்கும் கோரிக்கைகளையும், அவைகள் நிறைவேறுவதற்கு தடையாக இருக்கும் விஷயங்களையும் விலக்கி, நம்முடைய வேண்டுதல்களை நிறைவேற்றி வைப்பார்.

விநாயகர் வழிபாட்டின் பலன்கள்

நமக்கு ஏற்படும் துன்பம், தடை, தோல்வி ஆகியவற்றிற்கு நம்முடைய கர்மவினைகளே காரணமாக உள்ளன. கர்மவினைகள் நீங்கும் போகும் நம்முடைய கஷ்டங்கள், மனக்குறைகள் நீங்கி மகிழ்ச்சி கிடைப்பதுடன், முக்தி அடைவதற்கான வழியும் பிறக்கிறது. அதனால் தான் விநாயகரை வழிபட்டால் இந்த பிறவியில் இன்பங்களையும், இந்த பிறவிக்கு பிறகு அழியாத ஆனந்த நிலையான முக்தியும் கிடைக்கும் என்றார்கள். எளிய வழிபாட்டையும் ஏற்றுக் கொண்டு பெரும் புண்ணியங்களை, நன்மைகளை நமக்கு அருள்வதாலேயே விநாயகர் வழிபாடு அனைவரும் செய்வது அவசியம் என சொல்லப்படுகிறது. தமிழ் கலாச்சாரத்தில் விநாயகப் பெருமான் முக்கியத்துவம் வாய்ந்த ஒரு தெய்வம்.

அடிக்கடி கேட்கப்படும் கேள்விகள் (FAQ)