விநாயகருக்கு கொழுக்கட்டை, மோதகம் ஏன் படைக்கிறோம்?

கொழுக்கட்டை படைப்பதன் பின்னணி: ஞானபாலி மன்னன் கதை

முன்னொரு காலத்தில் ஞானபாலி என்ற மன்னன் விநாயகரின் தீவிர பக்தனாக வாழ்ந்து வந்தான். அவன் தினமும் விநாயகருக்கு பூஜை செய்து வழிபடுவதை எந்நாளும் தவறவிட்டதில்லை. ஒருமுறை இவனுடைய நாட்டில் கடும் பஞ்சம் ஏற்பட்டபோது, ராஜகுருவின் ஆலோசனைப்படி ஒரு மிகப்பெரிய யாகத்தை நடத்தினான். யாகம் நடைபெற்றுக்கொண்டிருந்த வேளையில், தேவலோக நடன மங்கையான மேனகையைக் கண்ட ஞானபாலி, அவள் அழகில் மயங்கி அவளைப் பின்தொடர்ந்தான். இதனால் யாகம் பாதியில் தடைபட்டது.

யாகம் பாதியில் நின்றதால் மிகுந்த கோபம் அடைந்த அஷ்டதிக்கு பாலகர்கள், ஞானபாலிக்கு 'ஒற்றைக் கண் அரக்கனாக மாறுவாய்' எனச் சாபமளித்தனர். அஷ்டதிக்கு பாலகர்களின் சாபத்தால் அரக்கனாக மாறிய ஞானபாலி, நாட்டில் உள்ள மக்களைப் பிடித்துச் சாப்பிட்டு, கடுமையாக அச்சுறுத்தி வந்தான். இந்த அரக்க நிலையிலும், அவன் தினமும் விநாயகரை வழிபடுவதை மட்டும் கைவிடவில்லை.

ஒரு கட்டத்தில் அரக்கனாக ஞானபாலியின் கொடுமைகள் அதிகரித்ததால், அவனை அழிப்பதற்காக விநாயகரே நேரில் வந்தார். விநாயகருக்கும் ஞானபாலிக்கும் இடையே கடுமையான போர் நடைபெற்றது. ஒரு கட்டத்தில் தன்னுடன் போரிடுபவர் தான் தினமும் வணங்கும் விநாயகர் என்பதை அறிந்த ஞானபாலி, மனம் திருந்தி, வருந்தினான். விநாயகரிடம் மன்னிப்பும் கேட்டான். இரக்கம் கொண்ட விநாயகரும் அவனை மன்னித்தார்.

தனக்கு எப்போதும் தங்களுடன் இருக்கும் வரத்தை அளித்து அருள வேண்டும் என விநாயகரை வேண்டினான் ஞானபாலி. தனது தீவிர பக்தனான ஞானபாலியின் கோரிக்கையை ஏற்ற விநாயகர், அரக்கனாக இருந்த ஞானபாலியை ஒரு கொழுக்கட்டையாக மாற்றி விழுங்கினார். ஞானபாலியின் பக்தியையும், எந்த நிலையில் இருந்தாலும் தன்னை வணங்குவதை விடாப்பிடியாகக் கடைபிடித்த பக்தனுக்கு விநாயகர் அருள் செய்ததையும் அனைவரும் அறிய வேண்டும் என்பதற்காகத்தான் விநாயகருக்கு கொழுக்கட்டை படைத்து வழிபடுகிறோம்.

மோதகம் படைப்பதன் பின்னணி: அனுசுயா தேவி கதை

அதேபோல மோதகம் படைப்பதற்கு மற்றொரு கதையும் புராணத்தில் சொல்லப்படுகிறது. ஒருமுறை சிவன், பார்வதி, விநாயகர் ஆகியோரை அர்தி என்ற ரிஷியின் மனைவியான அனுசுயா விருந்திற்காக அழைத்திருந்தார். என்ன உணவைச் சாப்பிடக் கொடுத்தாலும் விநாயகரின் பசியைத் திருப்தி செய்ய முடியாது எனப் புரிந்து கொண்ட அனுசுயா, இனிப்பு கலந்த மோதகத்தை சாப்பிடக் கொடுத்தார்.

அந்த மோதகத்தைச் சாப்பிட்டதும் விநாயகப் பெருமானின் மனது பூரித்துப் போய், மகிழ்ச்சி அடைந்தார். இதனால், அனுசுயா மொத்தமாக 21 மோதகங்களை விநாயகருக்கு அளித்தார். இதைக் கண்ட பார்வதி தேவி, அனுசுயாவைப் போல எவர் ஒருவர் விநாயகருக்கு மோதகம் படைத்து வழிபடுகிறார்களோ, அவர்களின் விருப்பங்கள் அனைத்தையும் விநாயகப் பெருமான் நிறைவேற்றுவார் என வரமளித்தார். பார்வதி அளித்த வரத்தின்படி, பக்தர்கள் தங்கள் விநாயகரிடம் முன்வைத்த கோரிக்கைகள் நிறைவேறுவதற்காக மோதகத்தை நைவேத்தியமாகப் படைக்கிறார்கள். இந்த விநாயகர் வழிபாடு முறைகள் ஜோதிடம் மற்றும் பக்தியில் பெரும் பங்கு வகிக்கின்றன.