தைம் இலைகள், பூக்கள், மற்றும் தைம் எண்ணெய் மருத்துவ குணங்கள் நிறைந்தது. 400-க்கும் மேற்பட்ட தைம் வகைகள் உள்ளன. இது வெறும் நறுமணம் கொண்ட மூலிகை மட்டுமல்லாமல், பண்டைய காலத்தில் விஷத்தை முறிக்கப் பயன்படுத்தப்பட்டதாகவும் கூறப்படுகிறது. உடல் ஆரோக்கியத்திற்கு பல்வேறு நன்மைகளை வழங்கும் இந்த தைம் மூலிகை, குறிப்பாக சளி மற்றும் இருமலை குணப்படுத்த மிகச் சிறந்த தீர்வாக அமைகிறது. உங்களுக்கு இருமல் இருந்தால் தைம் மூலிகையை எப்படி பயன்படுத்துவது, அதன் ஊட்டச்சத்துக்கள் மற்றும் மருத்துவ நன்மைகள் என்னென்ன என்பதை இங்கு விரிவாக அறிந்துகொள்வோம்.
தைமில் உள்ள ஊட்டச்சத்துக்கள்
தினமும் உடலுக்குத் தேவையான வைட்டமின்களைப் பெறுவது கடினமாக இருந்தாலும், தைமில் பல அத்தியாவசிய சத்துக்கள் நிறைந்துள்ளன. USDA (U.S. Department of Agriculture) கூற்றுப்படி, தைமில் வைட்டமின் ஏ, வைட்டமின் சி, தாமிரம், நார்ச்சத்து, இரும்பு மற்றும் மாங்கனீஸ் போன்ற முக்கியமான ஊட்டச்சத்துக்கள் உள்ளன.
குறிப்பு: அதிக அளவு தைம் சாப்பிட்டால் மட்டுமே இந்த சத்துக்களைப் பெற முடியும். உதாரணமாக, 1 டீஸ்பூன் தைமில் 1.28 மில்லிகிராம் வைட்டமின் C உள்ளது, இது ஒரு நாளின் தேவையில் 1 சதவீதம் மட்டுமே (FDA கூற்றுப்படி).
தைம் எப்படி இருமலுக்கு உதவுகிறது?
தைம் இலைகளில் இருந்து எடுக்கப்படும் தைம் எசன்ஷியல் எண்ணெய் இருமலுக்கு ஒரு இயற்கையான மருந்தாகப் பயன்படுத்தப்படுகிறது. பல ஆய்வுகள் தைமின் இருமல் நிவாரண பண்புகளை உறுதிப்படுத்துகின்றன:
- 2006 ஆய்வு: தைம்/ஐவி இலைகள் கலவை இருமலைக் குறைத்து, கடுமையான மூச்சுக்குழாய் அழற்சியின் அறிகுறிகளையும் குறைத்தது.
- 2018 ஆய்வு: தைம் மற்றும் ப்ரிமுலா சாறுகள் சேர்ந்த கலவை, விலங்குகளின் உடலில் வீக்கத்தையும், சளியையும் குறைத்தது கண்டறியப்பட்டது.
- ஜெர்மன் ஆய்வு: இருமலுக்குப் பயன்படுத்தப்படும் ஒரு சிரப் (BNO 1200, Bronchipret drops) பற்றிய ஆய்வில், 730 நோயாளிகள் மேல் சுவாசக் குழாய் நோய்த்தொற்றுகளால் வந்த இருமலுக்கு இந்த சிரப்பை உபயோகித்தபோது, சராசரியாக 7 நாட்களில் இருமல் மற்றும் உடல் உபாதைகள் கணிசமாகக் குறைந்தன. தைம் வாய் வழியாக எடுத்துக்கொள்வது கடுமையான இருமலுக்கு நல்லது மற்றும் பாதுகாப்பானது என்று நிரூபிக்கப்பட்டுள்ளது.
எனினும் இது குறித்து இன்னும் ஆராய்ச்சிகள் நடைபெறுகின்றன. இருமல் இருக்கும் போது தைம் பயன்படுத்தலாம். தைம் எப்படி உள்ளுக்கு எடுப்பது என்பதை இப்போது தெரிந்துகொள்வோம்.
தைம் டீ தயாரிக்கும் முறை
இருமலையும் சளிப் பிரச்சனையையும் போக்க இளஞ்சூடான பானத்தை விரும்பினால், நீங்கள் தைம் டீ குடிக்கலாம். இது மிகவும் எளிமையானது.
தேவையான பொருட்கள்:
- உலர்ந்த தைம் - 1 டீஸ்பூன்
- பட்டை - சிறிது (விரும்பினால்)
- தண்ணீர் - 1 கப்
- இனிப்புக்கு - தேன் (தேவையெனில்)
செய்முறை:
- தண்ணீரை கொதிக்க வைத்து அதில் தைம் இலைகள் சேர்த்து மேலும் ஒரு கொதி விடவும்.
- அடுப்பை அணைத்துவிட்டு, 10 நிமிடங்கள் வரை மூடி வைத்தால் அதன் சாரம் முழுவதும் தேநீரில் இறங்கிவிடும்.
- இப்போது வடிகட்டி, இனிப்பு தேவையெனில் தேன் சேர்த்து குடிக்கலாம்.
அதே போன்று தைம் மூலிகையை சூப்பில் சேர்த்தும் குடிக்கலாம். இவையும் இருமலைக் கட்டுப்படுத்த உதவும். நாள் ஒன்றுக்கு இரண்டு முறைக்கு மேல் எடுக்க வேண்டாம். சரியான அளவு கண்டறிய மருத்துவரை ஆலோசிப்பது பாதுகாப்பானது.
தைமின் ஆரோக்கிய நன்மைகள் என்னென்ன?
தைம் மூலிகை இருமலை கட்டுப்படுத்துவதோடு மட்டுமல்லாமல், வேறு பல ஆரோக்கிய நன்மைகளையும் வழங்குகிறது:
- இரத்த அழுத்தத்தை குறைக்கிறது
- நோயெதிர்ப்பு சக்தியை அதிகரிக்கிறது
- முகப்பரு வராமல் தடுக்கிறது
- கொசு விரட்டியாக உதவுகிறது
- பாக்டீரியா தொற்றை தடுக்கிறது
- ஈஸ்ட் தொற்றுக்கு சிகிச்சை அளிக்க உதவுகிறது
- சில வகையான புற்றுநோய்க்கு எதிராக உதவுகிறது
தைம் பக்கவிளைவுகள் உண்டு செய்யுமா?
தைம் மூலிகை சமையலுக்கு நல்லது. அளவோடு பயன்படுத்தினால் பாதுகாப்பானது. ஆனால், அதிகமாக சாப்பிட்டால் சில பக்க விளைவுகள் வரலாம்:
- வயிற்று வலி
- தலைவலி
- மயக்கம்
முக்கிய எச்சரிக்கை:
- தைம் எண்ணெயும் மிதமாக பயன்படுத்த வேண்டும்.
- கர்ப்பிணிகள் தைம் எண்ணெய் மற்றும் சப்ளிமெண்ட்ஸ் எடுப்பது கர்ப்ப காலத்தில் ஆபத்தானது, கருச்சிதைவு ஏற்படலாம். (சமையலில் தைம் சேர்ப்பது ஆபத்தில்லை.)
- குழந்தைகளுக்கு தைம் எண்ணெய் அல்லது சப்ளிமெண்ட்ஸ் கொடுக்கக்கூடாது.
மேலும் தைம் மூலிகையை உள்ளுக்கு எப்படி பயன்படுத்தினாலும், உபயோகிக்கும் முன் மருத்துவரை அணுகுவது சிறந்தது.
இறுதியாக,
தைம் என்னும் மூலிகை குறித்த பொதுவான நன்மைகள் மட்டுமே இங்கு வழங்கப்பட்டுள்ளது. தைம் எப்படி இருமலுக்கு உதவுகிறது, எப்படி தைம் மூலிகை எடுக்கலாம் என்பதை அறிந்துகொண்டோம். ஆனால் இதை பயன்படுத்துவதற்கு முன்பு மருத்துவரை அணுகி ஆலோசிப்பது அவசியம்.
பொறுப்பு துறப்பு: இந்த கட்டுரையில் வழங்கப்பட்டுள்ள தகவல்கள் பொதுவான நோக்கங்களுக்காக மட்டுமே. மருத்துவ ஆலோசனை, நோயறிதல் அல்லது சிகிச்சைக்கு மாற்றாக இல்லை. மேலும் விவரங்களுக்கு எப்போதும் மருத்துவரை அணுகவும். இங்கு வழங்கப்பட்ட தகவலின் துல்லியம், நம்பகத்தன்மைக்கு jothidam360.in பொறுப்பேற்காது.