திருவோண விரதம்: பெருமாளின் அருள் பெற அற்புதமான நாள்

திருவோண விரதத்தின் மகிமைகள்

பெருமாளின் திருமார்பில் மகாலட்சுமி நிரந்தரமாக வாசம் செய்வதால், அவரை வழிபட்டால் செல்வ செழிப்பு ஏற்படும், வீட்டில் உள்ள தரித்திர நிலை மாறும் என்பது ஆழமான நம்பிக்கை. மேலும், திருப்பதி பெருமாளைப் பணக்காரக் கடவுள் எனப் பக்தர்கள் வர்ணிப்பதால், அவரை வழிபட்டால் நம்முடைய கஷ்டங்களும் நீங்கிவிடும் என்பது பக்தர்களின் அசைக்க முடியாத நம்பிக்கை. பொதுவாக, பெருமாளின் அருளைப் பெறுவதற்காக பெரும்பாலானவர்கள் சனிக்கிழமை, ஏகாதசி ஆகிய நாட்களில் மட்டுமே விரதம் இருந்து வழிபடுவது வழக்கம்.

ஆனால், பெருமாளின் அருளைப் பரிபூரணமாகப் பெறுவதற்கும், எந்தக் குறையும் இல்லாமல் நிறைவான செல்வத்துடன், நிறைவாக வாழ்க்கை வாழவும், பெருமாளுக்கு விருப்பமான மிக முக்கியமான நாளில் விரதம் இருந்து, வழிபடுவது மிக அவசியம். பெருமாளின் திருநட்சத்திரமான திருவோண நட்சத்திரம் அவருக்கு மிகவும் உகந்ததாகும். 27 நட்சத்திரங்களில் "திரு" எனச் சிறப்பித்துச் சொல்லப்படும் நட்சத்திரம் பெருமாளுக்குரிய திருவோணம் மற்றும் சிவபெருமானுக்குரிய திருவாதிரை நட்சத்திரங்கள் மட்டுமே.

அதனால், பெருமாளுக்குப் பிடித்த திருவோண நட்சத்திரம் வரும் நாட்களில் திருவோண விரதம் மேற்கொள்ளுங்கள். திருமாலை மாலையில் ஆலயம் சென்று தரிசியுங்கள். வாழ்வில் எல்லா சந்தோஷங்களையும் தந்தருள்வார். திருவோண விரதம் மேற்கொள்பவர்களின் வாழ்வில், கஷ்டங்கள் அனைத்தும் நீங்கும். வீட்டின் தரித்திரம் விலகும். ஐஸ்வர்யம் பெருகும். மனக்குறைகளும் கவலைகளும் காணாமல் போகும்.

மிக முக்கியமாக, திருவோண விரத நாளில், பெண்கள் திருமாலை தரிசித்து வேண்டிக்கொண்டால், அவர்களின் கண்ணீரையும் கஷ்டத்தையும் துடைத்தருள்வார் திருமால். அவர்கள் விரும்பியதெல்லாம் தந்தருள்வார். திருமணம் தாமதமாகிக்கொண்டிருக்கிறதே எனும் நிலை முற்றிலுமாக மாறும். கல்யாண மாலை தோள் சேரும். அதேபோல், நீண்டகாலம் குழந்தை இல்லையே என ஏங்கித் தவித்தவர்களுக்கு, குழந்தை பாக்கியம் கிடைக்கும்.

திருவோண விரதம் இருக்கும் பக்தர்கள், மகா விஷ்ணுவை வணங்கி அவரின் திருநாமங்களைச் சொல்லிக்கொண்டே இருங்கள். விஷ்ணு புராணங்களைப் பாராயணம் செய்யலாம். சுவாமிக்கு நிவேதித்தப் பொருட்களை எல்லோருக்கும் பகிர்ந்தளிப்பது சிறப்பு. திருவோணம் நட்சத்திரம் வரும் நாளில் விரதம் இருக்க முடியாதவர்கள் அருகில் உள்ள பெருமாள் கோயில்களுக்குச் சென்று வழிபட வேண்டும். இந்நாளில், மாலை வேளையில், வீட்டில் நெய் விளக்கேற்றி வழிபடுங்கள். சகல தோஷங்களும் விலகும். சந்தோஷம் மட்டும் வீட்டில் நிறைந்திருக்கும் என்பது உறுதி.

திருவோண நட்சத்திரத்தில் பிறந்தவர்கள், சந்திர திசை நடப்பவர்கள், பெருமாளைக் குலதெய்வமாகக் கொண்டவர்கள், ஜோதிட ரீதியாக சுக்கிர யோகம் தடைப்பட்டிருப்பவர்கள், பெருமாளை தரிசித்து துளசி மாலை சார்த்தி பிரார்த்தனை செய்து கொள்ளுங்கள். கடன் தொல்லையில் இருந்து விடுபடுவீர்கள். கஷ்டங்களும் நஷ்டங்களும் காணாமல் போகும்.