சீதா நவமி: விரத பலன்கள் மற்றும் பூஜை முறை

'நான் என்னுடைய கணவருடன் தான் இருப்பேன். இன்பத்திலும் துன்பத்திலும் ஒருவருக் கொருவர் விட்டுக் கொடுக்காமல் ஆதரவாக இருந்து ஒன்றாக வாழ்வோம், அந்நியோன்யமாக இருப்போம்' என்று ஒரு பெண் உறுதி மேற்கொள்ளவே இந்த விரதம் கடைப்பிடிக்கப்படுகிறது. திருமணமான பெண்கள் தங்களின் கணவரின் ஆரோக்கியத்திற்காகவும், அமைதியான, ஒற்றுமையான வாழ்விற்காகவும் சீதா தேவியை வேண்டி விரதம் இருந்தால், இனிய குடும்ப வாழ்க்கை அமையும் என்பது நம்பிக்கை. திருமணம் தள்ளிப்போகும் கன்னிப் பெண்களும் இவ்விரதத்தை மேற்கொண்டால், ராம பிரானைப் போல அழகும் பண்பும் நிறைந்த கணவன் கிடைப்பான் என்பது நம்பிக்கை.

காலையில் குளித்து முடித்ததும் பூஜையறையை சுத்தம் செய்ய வேண்டும். ராமர், சீதா, லட்சுமணன் மற்றும் அனுமன் சேர்ந்து இருக்கும் படத்துக்கு சந்தனம், குங்குமம் வைத்து, மலர்கள் சூட்டி ஒரு சிறிய பலகை மீது வைக்க வேண்டும். விளக்கை ஏற்றி, சீதா சஹஸ்ரநாமத்தை கூறி மலர்களால் அன்னைக்கு அர்ச்சனை செய்ய வேண்டும். அன்னைக்குப் பிரசாதமாக பழம், சர்க்கரைப் பொங்கல், சுண்டல் போன்றவற்றை படைத்து வழிபடலாம். பின்பு சீதா தேவியின் வாழ்க்கை கதையை பக்தியோடு படிக்க அன்னையின் அருள் பரிபூரணமாக கிடைக்கும். விரதம் இருக்கும் காலங்களில் திட உணவுகளைத் தவிர்த்து பழம், பால், மோர், தண்ணீர், இளநீர் போன்ற திரவ உணவுகளையே எடுத்துக் கொள்ள வேண்டும். அன்றைய தினம் அருகில் இருக்கும் ராமர் ஆலயத்திற்குச் சென்று ராம பெருமானையும், சீதா தேவியையும் தரிசித்து மகா அபிஷேகம், ஆரத்தி ஆகியவற்றைக் காணலாம். வீட்டில் ராமாயணம் படிக்க இயலாதவர்கள், கோயில்களில் நடக்கும் கதாகாலட்சேபத்தை கேட்கலாம்.

அன்னையையும் ஶ்ரீராமனையும் பக்தியுடனும், தூய்மையான மனதுடனும் வழிபட அடக்கம், தியாகம், அர்ப்பணிப்பு, தாய்மை உணர்வு போன்ற குணங்களை நமக்கு அன்னை அருள்வாள். அதோடு கணவனுடன் என்றும் ஒற்றுமையுடன், சீரும் சிறப்புமாய் சௌபாக்கியவதியாக வாழவும் அருள்புரிவாள். அடிக்கடி கணவன்- மனைவி சண்டை, கருத்து வேறுபாட்டால் பிரிந்து இருப்பவர்கள் இந்த வழிபாட்டினை மேற்கொண்டால் விரைவில் அவர்களுக்குள் ஒற்றுமை ஏற்பட்டு, பிரிந்தவர்கள் மீண்டும் ஒன்று சேர்வார்கள் என்பது நம்பிக்கை. இந்த ஆன்மீக விரதம் குடும்ப உறவுகளை மேம்படுத்தும்.