கந்தசஷ்டி விரதம்: இருக்கும் முறை, பலன்கள்

கந்த சஷ்டி விரதம்: முக்கியத்துவம் மற்றும் பலன்கள்

முருகப் பெருமானின் அருளை பெறுவதற்கு ஏற்ற மிகச் சிறந்த விரதமாக கருதப்படுவது கந்தசஷ்டி விரதம் ஆகும். திருமணம், குழந்தை பாக்கியம், சொந்த வீடு, நோய்கள் தீர, வேலை என எந்த குறை தீர வேண்டும் என்றாலும் முருகப் பெருமானை மனதார வேண்டி, மகா கந்தசஷ்டியில் விரதம் இருந்தால் அது நிச்சயம் நிறைவேறும். கந்த சஷ்டி விரதம் பல முறைகளில் கடைபிடிக்கலாம். இவற்றில் உங்களுக்கு வசதியான முறையில் சஷ்டி விரதத்தை கடைபிடிக்கலாம். வீட்டில் இருந்தோ அல்லது கோவிலில் சென்று தங்கியோ கந்தசஷ்டி விரதம் அனுஷ்டிக்கலாம்.

வீட்டில் கந்த சஷ்டி விரதம் இருக்கும் முறை

கலசம் வைத்து விரதம் இருக்கும் முறை:

வீட்டில் கலசம் வைத்து விரதம் இருப்பவர்கள், கலசத்தில் தண்ணீர் நிரப்பி, வாசனை திரவியம், மஞ்சள் பொடி, ஒரு எலுமிச்சைப் பழம், ஒரு ரூபாய் நாணயம், 2 ஏலக்காய் ஆகியவற்றை போட்டு, அதன் மீது தேங்காய், மாவிலை வைத்து கலசம் அமைக்க வேண்டும். வாழை இலை அல்லது தாம்பூலத்தில் நெல் அல்லது பச்சரிசி பரப்பி, அதற்கு பிறகு கலசம் வைத்து, கந்தசஷ்டியின் ஏழு நாட்களும் வழிபட வேண்டும்.

படம் வைத்து வழிபடும் முறை:

படம் வைத்து வழிபடுபவர்கள், ஒரு பலகையில் சிவப்பு நிற வஸ்திரம் விரித்து, அதன் மீது வள்ளி, தெய்வானையுடன் இருக்கும் முருகப் பெருமானின் படத்தை வைத்து வழிபட வேண்டும். காப்பு கட்டாமலும் தினமும் முருகனுக்கு நைவேத்தியம் படைத்து, வழிபடலாம்.

காப்பு கட்ட நல்ல நேரம் மற்றும் விரதம் துவக்கும் முறை

காப்பு கட்ட நல்ல நேரம்: அக்டோபர் 22ம் தேதி காப்பு கட்டி, கலசம் அமைத்து, கந்த சஷ்டி விரதம் துவங்குவதற்கான நல்ல நேரம், காலை 4 முதல் 6 மணி வரை, காலை 6 முதல் 7 மணி வரை, காலை 09.10 முதல் 10.20 மணி வரை. பொதுவாகவே விரதம் துவங்குபவர்கள் காலை 6 மணிக்கு முன்பாக துவங்கி விடுவது சிறப்பு.

விரதம் துவக்கும் முறை: காலையில் எழுந்து முதலில் குல தெய்வத்தை வழிபட்டு விட்டு, விநாயகரை வணங்கி விட்டு, வீட்டில் உள்ள பெரியவர்களிடம் ஆசீர்வாதம் வாங்கி விட்டு, விரதத்தை துவக்கலாம். முதலில் என்ன நோக்கம் நிறைவேற வேண்டும் என்பதற்காக விரதம் இருக்கிறீர்களோ, அதை முருகப் பெருமானிடம் மனதார சொல்லி விட்டு, அந்த வேண்டுதல் நிறைவேறவும், இந்த விரதம் நல்லபடியாக நிறைவடைந்து, அதன் முழு பலனும் கிடைக்க வேண்டும் என வேண்டிக் கொண்டு விரதத்தை துவக்கலாம். முருகப் பெருமானுக்கு ஏதாவது ஒரு சிறப்பு நிற மலர் சாற்றி, சர்க்கரை பொங்கல் அல்லது கோதுமை பாயசம் அல்லது கோதுமை பொங்கல் இவற்றில் ஏதாவது ஒரு நைவேத்தியம் படைத்து வழிபடலாம். நம்முடைய வேண்டுதலுக்கு ஏற்ற திருப்புகழை பாராயணம் செய்து, அதை தினமும் காலையிலும், மாலையிலும் சொல்லி முருகப் பெருமானை வழிபாடு செய்ய வேண்டும்.

முருகனை வழிபடும் முறை மற்றும் மந்திரங்கள்

வீட்டில் ஷட்கோண தீபம் ஏற்றி, அதன் மீது ஆறு அகல் விளக்குகள் ஏற்றி வைத்து வழிபட வேண்டும். ஒரு நாளைக்கு ஒரு விளக்கு வீதம் அதிகரித்துக் கொண்டே செல்லலாம். கந்த சஷ்டி விரதம் இருப்பவர்கள் பகலில் தூங்காமல், நாள் முழுவதும் முருகனை நினைத்து விரதம் இருக்க வேண்டும்.

கலசம் அமைக்கும் போதும், படம் வைத்து வழிபடும் போதும், எப்போதும் ஓம் சரவண பவ மந்திரத்தை சொல்லிக் கொண்டே இருக்க வேண்டும். 108 முறை இந்த மந்திரத்தை சொல்லுவது சிறப்பு. இது தவிர கந்தர் அலங்காரம், கந்தர் அனுபூதி, கந்த சஷ்டி கவசம், கந்த குரு கவசம், திருப்புகழ் என முருகப் பெருமானுக்கு விருப்பமான பாடல்களை தினமும் காலையிலும், மாலையிலும் பாராயணம் செய்து வழிபட வேண்டும்.

முக்கிய அம்சங்கள்

• முருகன் சிந்தனையுடன் விரதம் இருங்கள்.
• கலசம் அமைத்து அல்லது படம் வைத்து வழிபடலாம்.
• காப்பு கட்டி விரதத்தைத் தொடங்குவது சிறப்பு.
• ஓம் சரவண பவ மந்திரம் 108 முறை உச்சரிப்பது நன்று.
• கந்த சஷ்டி கவசம், திருப்புகழ் போன்றவற்றை பாராயணம் செய்யுங்கள்.
• பகலில் தூங்காமல் முருகனை நினைத்து விரதம் இருங்கள்.
• எண்ணிய பலன்கள் கிடைக்க முருகப்பெருமானின் முழு அருள் கிடைக்கும்.