உடல் ஆரோக்கியம் என்பது வாழ்க்கையின் அனைத்து அம்சங்களுக்கும் அடிப்படை. ஜோதிட ரீதியாக ஒருவரின் நல்வாழ்வும், உடல்நலமும் முக்கியம். கல்லீரல் கோளாறுகளில் ஒன்றான மஞ்சள் காமாலை, பிலிரூபின் அதிக உற்பத்தியால் ஏற்படுகிறது. இதன் காரணங்கள், அறிகுறிகள் மற்றும் எளிய வீட்டு வைத்தியங்கள் பற்றி இங்கு விரிவாக காண்போம்.
மஞ்சள் காமாலை என்றால் என்ன?
மஞ்சள் காமாலை என்பது மிகவும் பொதுவான கல்லீரல் கோளாறுகளில் ஒன்றாகும். இது நம்முடைய கல்லீரலில் அதிகப்படியான பிலிரூபின் உற்பத்தியால் உண்டாகும் ஒரு பிரச்சினை. பிலிரூபின் என்பது சிவப்பு இரத்த அணுக்களில் இருந்து ஹீமோகுளோபின் உடைந்து வெளியேறும் போது உற்பத்தி செய்யப்படும் மஞ்சள்-ஆரஞ்சு நிற பித்த திரவம் ஆகும். இது அதிகமாகும்போது தான் கண்கள் மற்றும் சருமங்கள் மஞ்சளாக மாறுகின்றன. பிறந்த குழந்தைகளுக்கு இந்த மஞ்சள் காமாலை பிரச்சினை அதிக அளவில் உண்டாகிறது.
மஞ்சள் காமாலை உண்டாக காரணங்கள்
மஞ்சள் காமாலை மூன்று நிலைகளில் ஏற்படலாம்: பிலிரூபின் உற்பத்திக்கு முன்பு, பிலிரூபின் உற்பத்தி நடக்கும்போது, மற்றும் பிலிரூபின் உற்பத்திக்கு பிறகு. மேலும், பின்வரும் பல காரணங்களால் மஞ்சள் காமாலை உண்டாகக் கூடும்:
- அனீமியா: ஹீமோலிடிக் என்னும் ஒருவகை அனீமியாவால்.
- வைரஸ் தொற்றுகள்: எப்ஸ்டீன்-பார் வைரஸ், ஹெபடைடிஸ் ஏ, நாள்பட்ட ஹெபடைடிஸ் பி மற்றும் சி போன்ற வைரஸ்களால்.
- மரபணு குறைபாடுகள்: மிக அரிதான மரபணு வளர்சிதை மாற்ற குறைபாடுகள்.
- ஆட்டோ இம்யூன் நோய்கள்: உடலின் நோய் எதிர்ப்பு மண்டல பாதிப்புகள்.
- மது அருந்துதல்: அதிகப்படியாக மது அருந்துதல்.
- சில மருந்துகள்: அசெட்டமினோஃபென், கருத்தடை மாத்திரைகள், பென்சிலின், குளோர்ப்ரோமசைன், ஈஸ்ட்ரோஜென் அல்லது அனபோலிக் ஸ்டெராய்டுகள் போன்ற மருந்துகள்.
- பித்தப்பை மற்றும் கணையம் சார்ந்த பிரச்சனைகள்: பித்தப்பை புற்றுநோய், கணையத்தில் ஏற்படும் கட்டிகள், பித்தப்பை கற்கள், பித்தப்பையில் ஏற்படும் அழற்சி.
மஞ்சள் காமாலை நிலையின் அறிகுறிகள்
மஞ்சள் காமாலை ஏற்படும் எல்லோருக்கும் ஒரே மாதிரியான அறிகுறிகள் இருப்பதில்லை. அது உண்டாகும் காரணங்களுக்கு ஏற்ப அதன் அறிகுறிகளும் மாறுபடுகின்றன:
- பொதுவான அறிகுறிகள்: சருமம் மற்றும் கண்கள் மஞ்சள் நிறமாக மாறுதல், சிறுநீரின் நிறம் மாறுதல்.
- தொற்றுநோய்களால்: குளிர் காய்ச்சல், வயிற்று வலி.
- நோய்த்தொற்றுகள் இல்லாத நிலையில்: எடை இழப்பு, தோல் அரிப்பு.
- கல்லீரல் நோயால்: மூட்டுகளின் வீக்கம், கல்லீரல் அழற்சி, ஹெபடைடிஸ் A, B மற்றும் C யின் ஆரம்ப நிலையாக இருக்கலாம், சரும நோய்கள்.
மஞ்சள் காமாலைக்கான வீட்டு வைத்தியங்கள்
மஞ்சள் காமாலைக்கான சில இயற்கை வைத்தியங்கள் இங்கு பட்டியலிடப்பட்டுள்ளன. இவை மருத்துவரின் ஆலோசனைக்குப் பிறகு பின்பற்றப்பட வேண்டும்.
1. பிறந்த குழந்தை மஞ்சள் காமாலைக்கான சூரிய ஒளி சிகிச்சை
பிறந்த குழந்தைக்கு ஏற்படும் மஞ்சள் காமாலைக்கு இயற்கையான சூரிய ஒளி நன்மை பயக்கும். சூரிய ஒளியானது பிலிரூபின் உறிஞ்சும் தன்மை கொண்டது. நோய் அதிகமாகி லேசர் போன்ற சிகிச்சைக்கு செல்வதற்கு பதிலாக ஆரம்பத்தில் இருந்தே சூரிய ஒளியில் குழந்தையை தினமும் சிறிது நேரம் வைத்திருப்பது நல்லது.
2. உணவில் கட்டுப்பாடு அவசியம்
மஞ்சள் காமாலை உள்ளவர்கள் எவ்வளவு வீரியமான மருந்துகளை எடுத்துக் கொண்டாலும் அவர்கள் முதலில் கவனம் செலுத்த வேண்டியது அவர்களுடைய உணவில் தான். உணவுக் கட்டுப்பாடு மிக மிக முக்கியம். வேகவைத்த காய்கறிகள் எடுத்துக் கொள்ளலாம். ஆனால் அதில் எண்ணெய் சேர்க்கக் கூடாது. நெய், எண்ணெய், மசாலா பொருள்கள் ஆகியவற்றை மஞ்சள் காமாலை உள்ளவர்கள் சேர்த்துக் கொள்ளவே கூடாது. பாசிப்பருப்பு சேர்த்த கஞ்சி அதிகமாக எடுத்துக் கொள்ளலாம். நிறைய திரவ உணவுகள் எடுத்துக் கொள்ள வேண்டும். மஞ்சள் காமாலை உள்ளவர்கள் தங்கள் உணவில் புளி சேர்த்துக் கொள்ளவே கூடாது. உப்பு மிக மிக குறைவாகவே எடுத்துக் கொள்ள வேண்டும். இந்த உணவுக் கட்டுப்பாடுகளை கடைபிடிப்பதன் மூலம் மஞ்சள் காமாலையை கட்டுப்படுத்தவும் அதன் வீரியத்தை குறைக்கவும் செய்ய முடியும்.
3. கரும்பு ஜூஸ்
கரும்புச்சாறு நம்முடைய கல்லீரலில் சுரக்கும் பிலிரூபின் அளவை கட்டுக்குள் வைத்திருக்க உதவுவதால் மஞ்சள் காமாலை உள்ளவர்கள் கரும்பு சாறை அடிக்கடி எடுத்துக் கொள்வது நல்லது. மஞ்சள் காமாலை மட்டுமின்றி கல்லீரல் சம்பந்தப்பட்ட பல தொற்றுக்களுக்கும் கரும்புச்சாறு எடுத்துக் கொள்ளலாம். இதிலுள்ள இரும்புச்சத்து கல்லீரலை பலப்படுத்துவதோடு ரத்த ஓட்டத்தை சீராக்கி அதன் இயக்கத்தையும் அதிகரிக்கச் செய்கிறது.
4. பப்பாளி இலைகள்
டெங்கு போன்ற மோசமான வைரஸ் கிருமிகளையும் தாக்கி அழிக்கக் கூடியது தான் பப்பாளி இலை. இந்த பப்பாளி இலை உடலின் உள்ளுறுப்புகளில் உள்ள நச்சு, கழிவுகளை வடிகட்டி வெளியேற்ற உதவுகிறது. மஞ்சள் காமாலை என்பதே நம்முடைய கல்லீரல் ஏற்பட்டிருக்கும் ஒருவகை கழிவு தேக்கம் தான். அதனால் இதற்கு மருந்தாக பப்பாளி இலை பயன்படுத்தப்படுகிறது. பப்பாளி இலைகளை அரைத்து சாறெடுத்து அதனுடன் தேன் சேர்த்து பருகி வர மஞ்சள் காமாலை கட்டுக்குள் வரும்.
5. கருஞ்சீரகம்
கருஞ்சீரகம் ஒன்று மட்டும் வீட்டில் இருந்தாலே போதும். எந்தவித நோயும் நமக்கு வராமல் பார்த்துக் கொள்ள முடியும். சாவு ஒன்றைத் தவிர மற்ற எல்லாவித நோய்களுக்கும் கருஞ்சீரகத்தை மருந்தாக சாப்பிடலாம் என்று சொல்வார்கள். இந்த கருஞ்சீரகம் தான் காமாலைக்கும் அருமருந்தாக செயல்படுகிறது. மஞ்சள் காமாலை உள்ளவர்கள் கருஞ்சீரகத்தை லேசாக வெறும் வாணலியில் வறுத்து பொடி செய்து வைத்துக் கொண்டு அந்த பொடியை தினமும் சாப்பிட்டு வர மஞ்சள் காமாலையின் வீரியம் குறையும். வெந்நீர், பால் ஆகியவற்றில் கலந்தும் குடிக்கலாம்.
6. புதினா
புதினா வெறுமனே வாசனைக்காக மட்டும் உணவில் சேர்க்கும் பொருள் அல்ல. அதில் நிறைய மருத்துவ குணங்களும் மன ஆரோக்கியத்தை மேம்படுத்தி மூளையை புத்துணர்வோடு வைத்திருக்க உதவும். மஞ்சள் காமாலைக்கு கிராமங்களில் நாட்டு மருந்து கொடுக்கும்போது அதில் முக்கியமான ஒன்றாக இந்த புதினா குடிநீர் இருக்கும். புதினா டீ வழக்கமாகக் குடிப்பவர்களுக்கு கல்லீரல் சம்பந்தப்பட்ட பிரச்சினைகள் ஏற்படாமல் தடுக்க முடியும்.
7. நெல்லிக்காய்
நெல்லிக்காய் ஆங்கிலத்தில் indian goosberry என்று அழைக்கப்படுகிறது. கல்லீரலை சுத்தம் செய்யவும் கல்லீரல் நோய்களை குணப்படுத்தவும் மிகச்சிறந்த மருந்தாக ஆயுர்வேதத்தில் பயன்படுத்தப்படுகிறது. குறிப்பாக மஞ்சள் காமாலையை சரிசெய்ய நெல்லிக்காய், இலை மற்றும் நெல்லி மரத்தின் பட்டை ஆகியவை அனைத்துமே பயன்படுத்தப்படுகின்றன. நெல்லிக்காயை உணவில் சேர்த்துக் கொள்வதன் மூலம் கல்லீரலில் உள்ள பிலிரூபின் அளவு இயல்பு நிலைக்குத் திரும்பும். மஞ்சள் காமாலை உள்ளவர்கள் அடிக்கடி நெல்லிக்காய் ஜூஸ் குடித்து வர மஞ்சள் காமாலை கட்டுக்குள் வரும்.