வரலட்சுமி விரதம்: மகாலட்சுமியின் அருளையும் செல்வத்தையும் பெற!

ஷியாமாவின் கதை

செளராஷ்டிரா நாட்டு மன்னன் பத்ரஷர்வா மற்றும் மனைவி சந்திரிகா ஆகியோரின் மகள் ஷியாமா. ஒருமுறை, துவாதசி நாளில் வயிறு நிரம்ப சாப்பிட்டு ஓய்வெடுத்துக் கொண்டிருந்த சந்திரிகாவை, வயதான சுமங்கலி பெண் உருவில் வந்த மகாலட்சுமி கண்டித்தார். இதனால் கோபமடைந்த சந்திரிகா, மகாலட்சுமியை அவமதித்து அனுப்பிவிட்டாள். மனவேதனையுடன் சென்ற மகாலட்சுமியை மறித்த ஷியாமா, அவரது தாயிடம் சொல்ல வந்ததை அடக்கத்துடன் கேட்டறிந்து, வரலட்சுமி விரதம் இருக்கும் முறையை மகாலட்சுமியிடமிருந்தே கற்றாள்.

சில காலத்திலேயே ஷியாமா திருமணம் முடிந்து தன் கணவர் வீட்டிற்குச் சென்று, மகாலட்சுமி கூறியபடி வரலட்சுமி விரதத்தையும் ஒவ்வொரு வெள்ளிக்கிழமையும் மகாலட்சுமி பூஜையையும் கடைபிடித்து வந்தாள். இதனால் அவளுக்கு மகாலட்சுமியின் பரிபூரண அருள் கிடைத்தது.

மகாலட்சுமியை அவமதித்த பாவத்தால் சந்திரிகாவும் அவரது கணவரும் தங்கள் செல்வங்களையும் நாட்டையும் இழந்தனர். ஷியாமா அவர்களை அழைத்து வந்து அடைக்கலம் கொடுத்தாள். ஒருமுறை ஷியாமா அளித்த தங்கக் காசுகள் கரித்துண்டுகளாக மாறவே, தனது தாயின் தவறை உணர்த்தினாள். மகளின் அறிவுரைப்படி சந்திரிகாவும் வரலட்சுமி விரதம் இருக்க, இழந்த செல்வங்கள் அனைத்தும் மீண்டும் கிடைத்தது. ஷியாமா மற்றவர்களுக்கும் இந்த விரதத்தின் மகிமையை எடுத்துரைத்து, அவர்களை கடைபிடிக்கச் செய்தாள்.

சாருமதியின் கதை

மகத நாட்டில் வாழ்ந்த சாருமதி என்ற பதிவிரதை, தனது குடும்பத்தார் அனைவரையும் அன்புடன் கவனித்து, தினமும் மகாலட்சுமிக்கு பூஜை செய்து வந்தாள். அவளது நல்ல குணம் மற்றும் பக்திக்கு மனம் இறங்கிய மகாலட்சுமி, அவளது கனவில் தோன்றி வரலட்சுமி விரதத்தின் முறையையும், அதை கடைபிடித்தால் கிடைக்கும் செல்வ நலன்களையும் எடுத்துரைத்தார்.

தனக்கு வந்த கனவைப் பற்றி குடும்பத்தினரிடம் தெரிவித்த சாருமதி, அவர்களின் அனுமதியுடன் ஆடி மாத பௌர்ணமிக்கு முன்பு வரும் வெள்ளிக்கிழமையில் வரலட்சுமி விரதத்தை கடைபிடித்து, மகாலட்சுமியை வழிபட்டாள். இதன் பலனாக அவள் அனைத்து செல்வ நலன்களையும் பெற்று, சிறப்புடன் வாழ்ந்தாள். இந்த கதைகள் வரலட்சுமி விரதத்தின் மகத்தான பலன்களை உணர்த்துகின்றன.