கொசுக்கடியைத் தடுக்க மூலிகை வழிகள்: டாக்டர் விக்ரம்குமார் விளக்கம்

கொசுக்கடி ஏன் ஏற்படுகிறது?

கொசுக்கள் நம்மை கடிக்கும்போது, அதன் வாய் பகுதியைப் பயன்படுத்தி தோலை துளைத்து இரத்தத்தை உறிஞ்சுகின்றன. அப்போது அதன் உமிழ்நீர் சருமத்தில் படுகிறது. இந்த உமிழ்நீருக்கு உடல் எதிர்வினை புரிகிறது. இதனால் சருமத்தில் தடிப்பு மற்றும் அரிப்பு ஏற்படுகிறது. இந்த கொசுக்கடி சிலருக்கு லேசான பாதிப்பு ஏற்படுத்தலாம். மற்றவர்களுக்கு அதிகப்படியான வீக்கம், வலி மற்றும் சிவத்தல் உண்டாகலாம். ஒவ்வொருவரின் உடல்நிலையைப் பொறுத்து, கொசு கடியின் பாதிப்பும் மாறுபடும் என்கிறது நோய் கட்டுப்பாட்டு மற்றும் தடுப்பு மையம்.

இயற்கை வழிகள் ஏன் சிறந்தது?

கொசு வருவதைத் தடுக்க பல ஆய்வுகள் உள்ளன. அதில் ஓர் ஆய்வில் உடலை நறுமணத்துடன் வாசனையுடன் வைத்துக்கொண்டால் கொசு அருகில் வருவதைத் தவிர்க்கலாம் என்று கூறப்பட்டுள்ளது. கொசுவை அண்டவிடாமல் செய்யும் க்ரீம்கள் கடைகளில் கிடைக்கிறது. பலரும் அதை பயன்படுத்துகிறார்கள். ஆனால் சிலருக்கு இது சருமத்தில் அலர்ஜியை உண்டு செய்யலாம். மேலும் குழந்தைகளின் மென்மையான சருமத்திலும் வளரும் பிள்ளைகளுக்கும் இதை பயன்படுத்துவதைத் தவிர்த்து, இயற்கையான பாரம்பரியமான நமது மூலிகைகள் உதவும் என சித்த மருத்துவர் மரு.வி.விக்ரம்குமார் தனது இன்ஸ்டாகிராம் பக்கத்தில் விளக்கி இருக்கிறார்.

இரவு நேர மூலிகை குளியல்

உடலில் வியர்வை நீங்கவும், நிம்மதியான உறக்கத்துக்கும் இரவு நேர குளியல் உதவும். வீட்டில் கொசுத் தொல்லை அதிகம் இருந்தால், வீட்டில் அனைவருமே மாலை நேரத்தில் ஓர் குளியல் போடலாம். குறிப்பாக குழந்தைகளுக்கும் குளியல் நல்லது. குளிப்பதற்கு ஒரு மணி நேரம் முன்பு வேப்பிலை, கற்பூரவல்லி, நொச்சி, திருநீற்றுப் பச்சிலை போன்ற எண்ணெய் தன்மை கொண்ட இலைகளை தண்ணீரில் கொதிக்க வைத்து குளியல் நீரில் போடவும். ஒரு மணி நேரம் கழித்து குளிக்கவும். இந்த மூலிகை வாசனை உடலில் இருக்கும் வரை கொசு அண்டாமல் இருக்கும்.

காலை நேர மூலிகை குளியல்

கொசுக்கள் அதிகம் இருக்கும் பருவகாலங்களில் காலை நேர குளியலில் மூலிகைகள் சேர்த்து அரைத்து சருமத்தில் தடவி குளிக்கலாம். அப்போது சோப்பு பயன்படுத்த வேண்டாம். இது உடலில் நீண்ட நேரம் மூலிகை வாசனையை கொடுக்கும். வேப்பிலை, நொச்சி, கற்பூரவல்லி போன்ற மூலிகைகளை காம்பில்லாமல் சுத்தம் செய்து அரைத்து சருமம் வெளிப்படும் கை, கால், கழுத்து போன்ற இடங்களில் தடவி ஊறவைத்து குளித்தால் கொசுக்கடியிலிருந்து தப்பிக்கலாம்.

சோப்புக்கு மாற்றாக நலுங்கு மாவு

நலுங்கு மாவு பாரம்பரியமாக சோப்புக்கு மாற்றாகப் பயன்படுத்தக்கூடிய ஒன்று. கொசுக்கள் அதிகமாக இருக்கும் பருவங்களில் இந்த நலுங்கு மாவு தேய்த்து குளிக்கலாம். இந்த நலுங்கு மாவில் பூலாங்கிழங்கு, வெட்டிவேர், சந்தனம் போன்ற நறுமணமிக்கப் பொருள்களைச் சேர்ப்பதன் மூலம் கொசு அருகாமையில் வருவதைத் தடுக்க முடியும். இதனோடு மூலிகைகளை அரைத்து அதன் சாற்றை படுக்கையறையில் ஸ்ப்ரே செய்தாலும் கொசுக்கள் கடியிலிருந்து தப்பிக்கலாம். இயற்கையான முறையில் கொசுக்கடியிலிருந்து மீள்வதற்கு இதைச் செய்யலாம், குழந்தைகளுக்கும் பாதுகாப்பானது இது என்கிறார் மருத்துவர் விக்ரம்குமார்.

அடிக்கடி கேட்கப்படும் கேள்விகள்