திருவண்ணாமலை ஐப்பசி பௌர்ணமி கிரிவலம் 2025: தேதி, நேரம், முக்கியத்துவம்

திருவண்ணாமலையில் வருடத்தின் அனைத்து நாட்களும், எந்த நேரமும் கிரிவலம் சென்றாலும் பலன் கிடைக்கும் என்றாலும், மிகவும் பிரபலமானதாக சொல்லப்படுவது பவுர்ணமி கிரிவல வழிபாடு தான். மாதந்தோறும் பவுர்ணமி நாட்களில் ஆயிரக்கணக்கான பக்தர்கள் திருவண்ணாமலையில் கிரிவலம் செய்து வழிபடுவதை வழக்கமாக வைத்துள்ளார்கள். ஒவ்வொரு மாதமும் திருவண்ணாமலையில் பவுர்ணமி நாளில் கிரிவலம் செல்வதற்கு ஏற்ற நல்ல நேரத்தை அருணாச்சலேஸ்வரர் கோவில் நிர்வாகமே வெளியிட்டு வருவது குறிப்பிடத்தக்கது.

அந்த வகையில், 2025 ஆம் ஆண்டு நவம்பர் 05ம் தேதி புதன்கிழமை அன்று பவுர்ணமி வருகிறது. இது சிவ வழிபாட்டிற்கு மிகவும் ஏற்ற, சிவ பெருமானுக்கு வருடத்திற்கு ஒருமுறை அன்னாபிஷேகம் நடைபெறும் ஐப்பசி மாத பவுர்ணமி என்பது கூடுதல் சிறப்புடையதாகும். அஸ்வினி நட்சத்திரமும் பரணி நட்சத்திரமும் இணைந்து வரும் நாளில் ஐப்பசி பவுர்ணமி வருகிறது. அஸ்வினி நட்சத்திரத்திற்குரிய தெய்வம் சரஸ்வதி தேவி, பரணி நட்சத்திற்குரிய தெய்வம் யம தர்ம ராஜா ஆவார். பரணி நட்சத்திற்குரிய கிரகம் சுக்கிர பகவான் ஆவார்.

பொதுவாகவே புதன்கிழமையில் திருவண்ணாமலையில் கிரிவலம் சென்றால் கல்வி, கலைகளில் தேர்ச்சியும் முக்தியும் கிடைக்கும். அதுவும் புதன்கிழமையில் வரும் பவுர்ணமியில் மகாலட்சுமியையும் புதன் பகவானையும் வழிபட்டால் வியாபாரத்தில் லாபம், தொழிலில் வெற்றி, பேச்சுவன்மை ஆகியவை கிடைக்கும். இந்த ஆண்டு நவம்பர் மாதத்தில் வரும் ஐப்பசி பவுர்ணமியில் இத்தனை சிறப்புகளும் இணைந்து வரும் நாளில் திருவண்ணாமலையில் கிரிவலம் செல்வது மிக உயர்ந்த புண்ணிய பலனை தரும்.

கிரிவலம் செல்ல உகந்த நேரம்: நவம்பர் 04ம் தேதி இரவு 09.43 மணி துவங்கி, நவம்பர் 05ம் தேதி இரவு 07.27 வரை பவுர்ணமி திதி உள்ளது. இருந்தாலும், நவம்பர் 04ம் தேதி இரவு 10.36 மணி துவங்கி, நவம்பர் 05ம் தேதி மாலை 06.48 வரை திருவண்ணாமலை பவுர்ணமி கிரிவலம் செல்ல ஏற்ற நல்ல நேரமாக அறிவிக்கப்பட்டுள்ளது. இந்த நேரத்தில் கிரிவலம் வருவது சிறப்பானதாகும்.

வழக்கமாக ஐப்பசி பவுர்ணமியும், பரணி நட்சத்திரமும் இணைந்து வரும் நாளில் தான் ஈசனின் லிங்க திருமேனிக்கு அன்னாபிஷேகம் செய்வார்கள். அந்த வகையில் இந்த ஆண்டு நவம்பர் 05ம் தேதி மாலையே அனைத்து சிவன் கோவில்களிலும் அன்னாபிஷேகம் நடைபெறும். இந்த சமயத்தில் திருவண்ணாமலையில் கிரிவலம் வந்து, அஷ்ட லிங்கங்களையும் தரிசித்து, அண்ணாமலையாரையும் தரிசித்தால் எப்படிப்பட்ட பாவமும் தீர்ந்து முக்தி கிடைக்கும். அன்னத்திற்கு குறை என்பது ஏற்படாது. அதோடு கோடி லிங்கங்களை தரிசித்த பலனும், பவுர்ணமி கிரிவலம் வந்த பலனும் ஒரே சமயத்தில் கிடைக்கும். சிவனே மலையாக வீற்றிருக்கும் திருத்தலமாக கருதப்படும் திருவண்ணாமலையில் ஐப்பசி அன்னாபிஷேகம் அன்று கிரிவலம் வருவது சொல்ல முடியாத அளவிற்கு அற்புதமான பலன்களை பெற்றுத் தரும். முருகன் மற்றும் சிவன் ஆலயங்கள் இரண்டும் ஆன்மீகத்தில் முக்கியத்துவம் வாய்ந்தவை.