ஆஷாட நவராத்திரி வராஹி வழிபாடு: துன்பங்கள் நீங்கி நன்மைகள் பெருக

ஆஷாட நவராத்திரி என்றால் என்ன?

ஆஷாடம் என்பது நட்சத்திரக் கூட்டத்தை குறிக்கும். பூர்வ ஆஷாடம் மற்றும் உத்திர ஆஷாடம் என இரு கூட்டங்கள் உண்டு. இவை தமிழில் பூராடம், உத்திராடம் என மாறின. இந்த இரு நட்சத்திரங்களில் ஒன்றுடன் பவுர்ணமி இணைந்து வரும் மாதம் ஆஷாட மாதம் ஆகும். இதை நாம் தமிழில் ஆனி மாதம் என்கிறோம். இந்த மாதத்தில் வரும் அமாவாசை முதல் நவமி வரை உள்ள காலங்கள் ஆஷாட நவராத்திரியாகக் கொண்டாடப்படுகிறது.

இந்த ஆண்டு ஆஷாட நவராத்திரி ஜூன் 26ம் தேதி துவங்கி, ஜூலை 04ம் தேதி வரை கொண்டாடப்பட உள்ளது. பொதுவாக இந்துக்களுக்கு நான்கு நவராத்திரிகள் உண்டு என்றாலும், புரட்டாசி மாதத்தில் வரும் நவராத்திரியே மிகவும் பிரபலமானது.

நான்கு வகையான நவராத்திரிகள்:

• வசந்த நவராத்திரி: பங்குனி மாத அமாவாசை முதல் ஒன்பது நாட்கள்.
• ஆஷாட நவராத்திரி: ஆனி மாத அமாவாசை முதல் ஒன்பது நாட்கள். இது வராஹி அம்மன்க்குரியது.
• சாரதா நவராத்திரி: புரட்டாசி மாத அமாவாசையான மகாளய அமாவாசை முதல் ஒன்பது நாட்கள்.
• சியாமளா நவராத்திரி: தை மாத அமாவாசை முதல் ஒன்பது நாட்கள்.

இந்த நான்கு நவராத்திரிகளும் குறிப்பிட்ட பெண் தெய்வங்களுக்கு அர்ப்பணிக்கப்பட்டவை. அவ்வகையில் ஆனி மாதத்தில் வரும் ஆஷாட நவராத்திரி வராஹி அம்மனுக்குரியது.

ஏன் வராஹியை வழிபட வேண்டும்?

வராஹி அம்மன், அம்பிகையின் ஆற்றல் மிகுந்த அவதாரங்களில் ஒருவள். ஏழு சப்த கன்னியரில் இவளும் ஒருவர். முருகப் பெருமான், சூரனை வதம் செய்ய சென்ற பொழுது நவசக்திகள் அவதாரமாக வந்தது போல, அன்னை பராசக்தி, அசுரர்களை அழிக்க அவதாரம் எடுத்த போது அவருக்கு துணையாக ஆஷாட மாத பஞ்சமி திதியில் அவதரித்தவள்.

அன்னை பராசக்தியின் போர் படை தளபதியாக இருந்து, அம்பிகைக்கு வெற்றிகளைத் தேடி தந்தவள் வராஹி தேவி. வராகத்தின் பன்றி உருவம் கொடுத்து வழிபடச் சொன்னார்கள் ஞானியர். திருமாலும் வராஹ அவதாரத்தில் பன்றி வடிவத்திலேயே அவதாரம் எடுத்தார் என புராணங்கள் சொல்கின்றன.

வராஹம், பன்றி இரண்டும் ஒன்றா?

பன்றி என்பது வேறு, வராஹம் என்பது வேறு. பன்றி அசுத்தமானது, ஊர்களில் மக்களை அண்டி வாழும் இயல்புடையது. கண்டதையும் உணவாக உண்ணும் வழக்கம் உடையது. ஆனால் வராஹம், மலைகளிலும் காடுகளிலும் வாழும் பலமான மிருகம். பன்றியின் சாயலில் யானை போல கொம்பு தந்தங்களோடு நிற்கும். சுத்தமான தாவரபட்சி, யானை போல பலமானது.

வராகத்துக்கு எந்த விலங்குக்கும் இல்லாத சிறப்பாக அகழ்ந்தெடுக்கும் சக்தி உண்டு. அதாவது, பூமியினை தோண்டி சென்று கிழங்கும் இதர வேர்களையும் கண்டறியும் சக்தி வராகத்துக்கு மட்டும்தான் உண்டு. காட்டில் பலமானதும் வெல்ல முடியாதமுமான அந்த வராஹம் ஒன்றே பூமியினை அகழும்.

பெருமாள், அம்பிகைக்கு வராஹ வடிவம் ஏன்?

மனதின் ஆழம் வரை சென்று ஆசை, அகங்காரம், வன்மம், கோபம், காமம் என எல்லாவற்றையும் வேரோடு கிள்ளி எறிவதற்காக திருமாலும், அம்பிகையும் எடுத்த வடிவமே வராஹ அவதாரம். வராஹத்தின் மூச்சு கிட்டதட்ட பிரணவ மந்திரம் போன்ற ஒலியுடையது. இதை எல்லாம் குறியீடாக வைத்துத் தான், ஓம் என மந்திரத்தில் லயித்து மனம் தியானத்தில் இருந்தால் அகத்தின் அடியில் இருக்கும் எல்லா தீய குணங்களையும் இறைசக்தி வராகம் பூமியினை கிளறி எடுப்பது போல் எடுக்கும் என உணர்த்த வராஹத்தை தெய்வ உருவமாக்கினார்கள்.

அந்த உருவுக்கு இந்த தெய்வம் எதிரியினை அடிவேர் வரை சென்று அகற்றும், எதிரி மீண்டும் தளைக்க முடியாதபடி ஒழிக்கும் என சொல்லி வழிபட சொன்னார்கள்.

வராஹி வழிபாட்டின் சிறப்புகள்:

• எது மூழ்கி விட்டதோ, எது புதைந்து விட்டதோ அதை திரும்ப மீட்டு கொடுப்பது வராஹ தெய்வம்.
• அவளை வணங்கினால் தோல்வி வாரா, அவமானங்கள் வாரா, கண்ணீரோ கவலையோ வாரா, அதனாலே அவள் வராஹி எனப்பட்டாள்.
• எங்கெல்லாம் வெற்றி வேண்டுமோ அங்கெல்லாம் அவள் வழிபடப்பட்டாள்.
• ராஜராஜ சோழனுக்கு அவள் தனி பெரும் தெய்வமாக விளங்கியவள். தஞ்சை பெரியகோவிலுக்கு அவன் இடம் தேடிய பொழுது அவளே வராக உருவில் இடம் காட்டினாள்.
• விஜயநகர அரசை எழுப்பி, தென்னகத்தில் சுல்தான் ஆட்சியினை ஒழித்து இந்து ஆட்சியினை நிறுத்திய பெருமை வராஹியையே சாரும்.
• விவசாயம் செழிக்கவும், காடுகள் உருவாவதற்கும் வராஹத்தின் செயல்பாடுகள் காரணமாக அமைந்தன.
• மனதிலும், வாழ்க்கையிலும் இருக்கும் தீமைகளும், எதிரிகளும் வேரோடு அழிய அன்னையின் அருள் கிடைக்கவே ஆஷாட நவராத்திரி காலத்தில் வராஹியை பிரதான தெய்வமாக வழிபடுகிறோம்.

ஆஷாட நவராத்திரியில் வராஹி வழிபாடு:

இந்த ஒன்பது நாட்களும் வராஹியை வழிபட முடியாதவர்கள், எப்போது முடியுமோ அந்த சமயத்திலோ அல்லது பஞ்சமி திதியிலோ வழிபட்டால் வராஹியின் அருளால் அனைத்து விதமான துன்பங்களும் நீங்கி, நன்மைகள் அதிகரிக்கும். இது ஒரு சக்திவாய்ந்த ஜோதிடம் மற்றும் ஆன்மீக பரிகாரமாக கருதப்படுகிறது.

மனதிலும், வாழ்க்கையிலும் இருக்கும் தீமைகளும், எதிரிகளும் வேரோடு அழிய அன்னையின் அருள் கிடைக்க வேண்டும் என்பதற்காகத் தான் ஆஷாட நவராத்திரி காலத்தில் வராஹியை பிரதான தெய்வமாக வழிபடுகிறோம்.