செலவு ரசம் என்கிற பெயர் வேண்டுமானால் உங்களுக்குப் புதிதாக இருக்கலாம். ஆனால் சேர்க்கப்படும் பொருள்கள் எல்லாமே வீட்டில் அஞ்சறைப் பெட்டியில் உள்ள பொருள்கள் மட்டும் போதும். அவை என்னென்ன, அதை எப்படி பக்குவமாக எடுத்து ரசம் வைக்கிறதுனு பார்க்கலாமா! Jothidam360.in இல், பாரம்பரிய தமிழ் சமையல் கலைக்கு முக்கியத்துவம் அளிக்கிறோம்.
செலவு ரசம் செய்ய தேவையான பொருள்கள்:
- காய்ந்த மிளகாய் - 8
- சீரகம் - 2 ஸ்பூன்
- மிளகு - 2 ஸ்பூன்
- கொத்தமல்லி விதை - 3 ஸ்பூன்
- பூண்டு - 20 பல்
- கறிவேப்பிலை - ஒரு ஈர்க்கு
- சின்ன வெங்காயம் - 15
- கொத்தமல்லி இலை - சிறிதளவு
- மஞ்சள் - கால் ஸ்பூன்
- உப்பு - தேவையான அளவு
- நல்லெண்ணெய் - 2 ஸ்பூன்
செலவு ரசத்திற்கான மசாலா அரைக்கும் முறை:
இந்த செலவு ரசத்திற்கு முக்கியமானதே அதில் அரைக்கும் மசாலா தான். அதை எப்படி செய்வது என்று பார்ப்போம்.
- ஒரு கடாயில் ஒரு ஸ்பூன் நல்லெண்ணெய் ஊற்றி அதில் 6 காய்ந்த மிளகாய், சீரகம், 7 பல் பூண்டு, மிளகு, கொத்தமல்லி விதை (அல்லது கொத்தமல்லி பொடி) ஆகியவற்றைச் சேர்த்து வதக்க வேண்டும்.
- கடைசியாக கறிவேப்பிலையும் சேர்த்து வதக்கி விட்டு அதை ஆறவிட வேண்டும்.
- ஆறிய பிறகு இதை ஒரு மிக்ஸி ஜாரில் சேர்த்து நன்கு ஸ்மூத்தான பேஸ்ட்டாக அரைத்துக் கொள்ளுங்கள். நைசாக அரைக்க வேண்டும்.
சுவையான செலவு ரசம் செய்யும் முறை:
- ஒரு கடாயை அடுப்பில் வைத்து அதில் கடுகு, சீரகம் தாளித்து 2 காய்ந்த மிளகாயை கிள்ளி சேர்த்து தாளித்துக் கொள்ள வேண்டும்.
- அடுத்து அதில் மீதமுள்ள பூண்டு பற்கள் மற்றும் நறுக்கிய சின்ன வெங்காயத்தை சேர்த்து வதக்கி விட்டுக் கொள்ள வேண்டும்.
- அடுத்து அதில் சிறிது மஞ்சள் தூள், கறிவேப்பிலை சேர்த்து வதக்கி விட்டு பின்பு அரைத்து வைத்திருக்கும் செலவு பேஸ்ட்டை ஊற்றுங்கள்.
- தேவையான அளவு தண்ணீர் ஊற்றிக் கொள்ளுங்கள். தண்ணியாக இருந்தால் தான் சுவை அதிகமாக இருக்கும்.
- தேவையான அளவு உப்பு சேர்த்து நன்கு கொதிக்க விடுங்கள்.
- நன்கு கொதித்ததும் அதில் நறுக்கிய கொத்தமல்லி இலையைத் தூவி இறக்க வேண்டியது தான்.
செலவு ரசத்தில் உள்ள பொருட்களின் மருத்துவ நன்மைகள்:
- சீரகம்: அகத்தை சீராக்கி ஜீரண சக்தியைத் தூண்டும்.
- கறிவேப்பிலை: இதிலுள்ள வைட்டமின் சி நோயெதிர்ப்பு மண்டலத்தை வலுப்படுத்தும்.
- மிளகு: "மிளகு இருந்தால் எதிரிகள் வீட்டில் கூட சாப்பிடலாம்" என்ற பழமொழி உண்டு. இது சளி, இருமல் போன்ற பிரச்சனைகளுக்கு சிறந்த தீர்வு.
- கொத்தமல்லி விதை: வாதம், பித்தம், கபத்தை சீராக்கும். மழைக்காலத்தில் ஏற்படும் கபம் கட்டுக்குள் வரும்.
- பூண்டு: பல மருத்துவ குணங்கள் கொண்டது. கொலஸ்டிராலைக் கரைக்கும், ஆன்டி பாக்டீரியல் பண்பு கொண்டது.
- சின்ன வெங்காயம்: அற்புதமான மருந்து உணவு. சளியை அறுத்து வெளியேற்றும். ரத்தத்தை சுத்தப்படுத்தும்.
செலவு ரசம் சாப்பிடுவதால் கிடைக்கும் அற்புத நன்மைகள்:
மழைக்காலத்தில் வாரத்தில் 2 நாள் இந்த செலவு ரசம் வைத்து சாப்பிட்டால் சளி, இருமல் குறையும். எவ்வளவு நெஞ்சு சளி இருந்தாலும் வெளியேற்றும் தன்மை இந்த செலவு ரசத்துக்கு உண்டு. நெஞ்சு சளி, இருமலுக்கு மட்டுமல்ல, குழந்தை பெற்ற பெண்களுக்கும் பாலூட்டும் அம்மாக்களுக்கும் இந்த செலவு ரசத்தை கொங்கு நாட்டுப் பகுதிகளில் காலங்காலமாக கொடுக்கும் ஒரு உணவு. இதை சிறிய டம்ளரில் நேரடியாகவும் குடிக்கலாம். ஆனால் ஒரு கரண்டி சோறு போட்டு அதில் 4 கரண்டி ரசத்தை நிறைய ஊற்றி அலசிவிட்டு நன்கு அள்ளி சாப்பிட வேண்டும். ஒருமுறை சாப்பிட்டாலே போதும் சளி அறுத்துக் கொண்டு வெளியேறும்.
இறுதியாக, இவ்வளவு மருத்துவ குணம் கொண்ட செலவு ரசம் செய்வது மிக மிக எளிமை. இதற்கு எந்த பொருளும் வெளியே தேடவும் தேவையில்லை. வீட்டில் அஞ்சறை பெட்டியில் இருக்கும் பொருள்கள் தான். இப்போது எங்கு பார்த்தாலும் சளி, இருமல் என்று இருக்கிறார்கள். உங்க வீட்டிலயும் இந்த கொங்கு நாட்டு ஸ்பெஷல் செலவு ரசம் வெச்சு கொடுத்து பாருங்க. ஜீரண சக்தி மற்றும் நோய் எதிர்ப்பு சக்தி அதிகரிக்கும்.
பொறுப்பு துறப்பு:
இந்த கட்டுரையில் சொல்லப்பட்டவை தகவல் நோக்கங்களுக்காகவே. இது எந்தவித மருந்து மற்றும் மருத்துவ சிகிச்சைக்கு மாற்றானது அல்ல. இதன் உண்மைத் தன்மை, துல்லியம் மற்றும் செயல்திறனுக்கு Jothidam360 பொறுப்பாகாது.