எந்த கிழமையில் என்ன பொருள் வாங்கலாம்?

கிழமைக்கு ஏற்ற பொருட்களை வாங்குவதன் முக்கியத்துவம்

பொதுவாக சுப காரியங்கள் செய்வதற்கு மட்டுமே நல்ல நாள், நேரம் ஆகியவை பார்ப்பது வழக்கமாக உள்ளது. இது தவிர சொத்துக்கள் வாங்குவது, தங்கம், மங்கள பொருட்கள் வாங்குவது, வாகனங்கள் வாங்குவது ஆகியவற்றிற்கு மட்டுமே நாள், கிழமை எல்லாம் பார்க்கிறோம். ஆனால் நாம் அன்றாடம் வாங்கும் வீட்டிற்கு தேவையான பொருட்கள், உணவு பொருட்கள் உள்ளிட்டவற்றிற்கு நாளோ, நேரமோ பார்ப்பது கிடையாது.

நமக்கு வசதியான நேரத்தில் அல்லது தேவையான நேரத்தில் உடனடியாக கடைக்கு சென்று வாங்கி விடுகிறோம். ஆனால் அப்படி நாம் சாதாரண பொருட்கள் கூட தவறான நாள், நேரத்தில் வாங்குவதால் நாம் பல விதமான கஷ்டங்களை அனுபவிக்கிறோம். இந்து சமயத்தில் ஒவ்வொரு கிழமைக்கும் ஒரு சிறப்பு உள்ளதாக சொல்லப்படுகிறது. அதே போல் ஒவ்வொரு கிழமையும் நவகிரகங்களில் ஒவ்வொரு கோளுக்கு உரியது என சொல்லப்படுகிறது. அந்தந்த கோளுக்குரிய கிழமையில், அந்த கிழமைக்கும் கோளுக்கும் ஏற்ற பொருட்களை வாங்கி வைப்பதால் அந்த நவகிரகத்தின் ஆசியும், பல விதமான நன்மைகளையும் நாம் பெற முடியும் என ஜோதிடம் கூறுகிறது.

நவகிரக தானியங்கள் வாங்குவதன் பலன்கள்

பொதுவாகவே அந்தந்த ஒவ்வொரு கிழமையிலும், அந்த நாளுக்குரிய நவகிரகத்திற்குரிய தானியத்தை சிறிதளவாவது வீட்டில் வாங்கி வைப்பதாலும், தானம் அளிப்பதாலும் அந்த கிரகத்தால் ஏற்படும் கெடு பலன்கள் குறைந்து, அந்த கிரகத்தின் ஆசியால் நன்மைகள் அதிகரிக்க துவங்கும். இந்த தமிழ் ஜோதிட ரகசியங்களை பின்பற்றி நன்மை பெறுங்கள்.

• ஞாயிறு: சூரியனுக்குரிய தானியம் கோதுமை
• திங்கள்: சந்திரனுக்குரிய தானியம் அரிசி
• செவ்வாய்: செவ்வாய்க்கு உரிய தானியம் துவரம் பருப்பு
• புதன்: புதனுக்குரிய தானியம் பாசி பயறு
• வியாழன்: வியாழனுக்குரிய தானியம் கருப்பு கொண்டைக்கடலை
• வெள்ளி: சுக்கிரனுக்குரிய தானியம் மொச்சை
• சனி: சனிக்குரிய தானியம் கருப்பு எள்