விநாயகர் சதுர்த்தி என்பது விநாயகப் பெருமான் அவதரித்த தினம் என்றும், அசுரனை வதம் செய்த நாள் என்றும் புராணங்கள் சொல்கின்றன. உலகம் முழுவதும் உள்ள இந்துக்களால் வெகு விமர்சையாகக் கொண்டாடப்படும் விநாயகர் சதுர்த்தியின் முக்கிய அம்சமாக, களிமண்ணால் செய்யப்பட்ட புதிய விநாயகர் சிலையை வாங்கி வந்து வழிபடுவது உள்ளது. வீட்டில் உள்ள தீய சக்திகளை நீக்கி, செல்வச் செழிப்பைத் தரும் விநாயகர் சிலையைத் தேர்வு செய்வதற்கான முக்கிய வழிமுறைகளையும், துதிக்கை திசையின் ஜோதிட பலன்களையும் இங்கே காணலாம்.
விநாயகர் சிலை தேர்வு: துதிக்கை திசையின் முக்கியத்துவம்
விநாயகர் சதுர்த்தி அன்று புதியதாக ஒரு மண் விநாயகர் சிலை வாங்கி வந்து வழிபட்டு, பிறகு அந்த சிலையை மண்ணில் கரைப்பது முக்கியமானதாகும். விநாயகர் சிலையைத் தேர்வு செய்யும் போது மிக முக்கியமாக கவனிக்க வேண்டிய ஒன்று, சிலையில் துதிக்கை எந்தப் பக்கம் நோக்கியபடி உள்ளது என்பதுதான். விநாயகரின் துதிக்கை எந்த திசை நோக்கியுள்ளது என்பதன் அடிப்படையில் பல ஆன்மிக காரணங்களும் பலன்களும் உள்ளன. அவை என்னவென்று இங்கே விரிவாகப் பார்ப்போம்.
1. இடது பக்க துதிக்கை விநாயகர் (வாமாமுகி விநாயகர்)
இடது பக்கமாக துதிக்கை கொண்ட விநாயகருக்கு வாமாமுகி விநாயகர் என்று பெயர். பெரும்பாலும் விநாயகர் இந்த கோலத்திலேயே காட்சி தருவார். இடது துதிக்கை என்பது வட திசையுடன் தொடர்புடையது, இது சந்திர குணங்களை காட்டுவதாகும்.
இடது பக்கம் துதிக்கை கொண்ட விநாயகரை வழிபட்டால் அமைதி, பேரின்பம், செழிப்பு ஆகியவை கிடைக்கும். இது செல்வ செழிப்பைத் தரக்கூடிய வடிவம் என்பதால் பெரும்பாலானவர்கள் இதையே வழிபடுகிறார்கள். இவரை வீட்டில் வைத்து வழிபட்டால் வீட்டில் உள்ள தீய சக்திகள் விலகும். இவர் வாஸ்து தோஷங்களையும் நீக்கக் கூடியவர் என நம்பப்படுகிறது.
2. வலது பக்க துதிக்கை விநாயகர் (சித்தி விநாயகர்)
வலது பக்கம் துதிக்கை விநாயகர் அல்லது வலக்கை விநாயகரை சித்தி விநாயகர் என்று அழைக்கிறோம். இவர் உலகியல் இன்பங்களில் இருந்து விடுவிக்கக் கூடிய ஆன்மிக சிறப்பு கொண்டவர்.
இந்த வகையான விநாயகர் மிகவும் அரிதானவர். பெரும்பாலும் இந்த வடிவிலான விநாயகர் சிலைகள் கோவிலில் மட்டுமே இருக்கும். குறிப்பாக சித்தி விநாயகர் என்ற பெயரில் இருக்கும் விநாயகர் கோவில்களில் இந்த உருவில் இருப்பார்.
3. நேரான துதிக்கை விநாயகர்
நேராக துதிக்கை கொண்ட விநாயகர் வடிவம் மிக மிக அரிதானதாகும். இவர் சூட்சும நாடியை திறக்கும் திறன் கொண்டவர். இதுவே உடலுக்கு ஆற்றலை வழங்கும் மையமாக உள்ளது. இது தனிநபர்களுக்கும் வாழ்க்கை மற்றும் தெய்வீகத்திற்கும் இடையேயான தொடர்பை ஏற்படுத்துகிறது.
விநாயகர் சிலை வாங்கும் போது கவனிக்க வேண்டிய மற்ற அம்சங்கள்
- விநாயகர் சதுர்த்தி வழிபாட்டிற்கு விநாயகர் சிலையை தேர்வு செய்யும் போது கையில் மோதகம் வைத்திருப்பது போலவும், மூஷிக வாகனத்தை உடன் வைத்திருப்பது போன்ற சிலையை வீட்டில் வாங்கி வந்து வழிபடுவது சிறப்பு.
- அதே போல் நீரில் எளிதில் கரையக் கூடிய, சுற்றுச் சூழலுக்கு பாதிப்பு ஏற்படாமல் இருக்கும் வகையிலான விநாயகர் சிலைகளை தேர்வு செய்வது மிக மிக அவசியமானதாகும்.