சந்திரனின் ஆதிக்கம் நிறைந்த பவுர்ணமி தினத்தில், சிவபெருமான் வீற்றிருக்கும் திருவண்ணாமலையில் கிரிவலம் வருவது எண்ணற்ற புண்ணியங்களைத் தரும். குறிப்பாக அக்டோபர் மாத புரட்டாசி பவுர்ணமி கிரிவலம், தெய்வீக ஆற்றலையும், ஆரோக்கியத்தையும் பெருக்கும் என்பது ஐதீகம். இந்த சிறப்புமிகு கிரிவலம் பற்றிய முழுமையான தகவல்களை இந்த கட்டுரையில் காணலாம். ஜோதிட ரீதியாகவும் இது மிகுந்த முக்கியத்துவம் வாய்ந்தது.
திருவண்ணாமலை பவுர்ணமி கிரிவலம் சிறப்பு அம்சங்கள்
சந்திரனின் ஆதிக்கம் நிறைந்த பவுர்ணமி தினம் வழிபாட்டிற்கும், கிரிவலம் செல்வதற்கும் மிகவும் உன்னதமான நாளாகும். சந்திரனை தலையில் சூடிய சிவ பெருமானையும், குல தெய்வத்தையும் வழிபடுவதற்கு மிகவும் ஏற்ற நாளும் பவுர்ணமி தான். சிவனே மலையாக வீற்றிருப்பதாக பக்தர்களால் போற்றப்படும் திருவண்ணாமலையில் கிரிவலம் வருவதால் சந்திரனின் கதிர்கள், மலை மீது பட்டு, கிரிவலம் வரும் பக்தர்களின் மீது எதிரொலிக்கும் போது அவர்களின் வாழ்க்கையில் மிகப் பெரிய மாற்றம் ஏற்படும் என சொல்லப்படுகிறது. தமிழகத்தில் உள்ள பல மலைக்கோவில்களிலும் கிரிவலம் வந்து வழிபடும் வழக்கம் இருந்தாலும் திருவண்ணாமலையில் கிரிவலம் வருவதே மிகவும் உயர்வானதாக கருதப்படுகிறது. திருவண்ணாமலையில் ஒவ்வொரு மாதமும் பவுர்ணமி நாட்களில் லட்சக்கணக்கான பக்தர்கள் கிரிவலம் வந்து, அண்ணாமலையாரை தரிசனம் செய்யும் வழக்கம் உள்ளது.
பக்தர்களின் வசதிக்காக ஒவ்வொரு மாதமும் திருவண்ணாமலையில் பவுர்ணமி கிரிவலம் வருவதற்கான நாள் மற்றும் நேரத்தை திருவண்ணாமலை அண்ணாமலையார் கோவில் நிர்வாகம் வெளியிட்டு வருகிறது. அந்த வகையில் அக்டோபர் மாதம் திருவண்ணாமலை பவுர்ணமி கிரிவலம் செல்வதற்கான நாள் மற்றும் நேரம் அறிவிக்கப்பட்டுள்ளது. புரட்டாசி மாதம் ஆன்மிகத்திற்கும், புண்ணியங்களை அதிகம் சேர்ப்பதற்குமான மாதமாகும். புரட்டாசி மாதத்தில் செய்யப்படும் வழிபாடுகள், விரதங்கள், தான தர்மங்கள் என எதை செய்தாலும் அது இரண்டு மடங்காக பலன் தரக் கூடியதாகும். இந்த மாதத்தில் பவுர்ணமி கிரிவலம் செல்வதும் இரண்டு மடங்கு பலன் தரக் கூடியதாக அமையும்.
அக்டோபர் மாத பவுர்ணமி கிரிவலம்: தேதி, நேரம்
- இந்த ஆண்டு அக்டோபர் மாத பவுர்ணமி அக்டோபர் 06 ஆம் தேதி திங்கட்கிழமை அன்று வருகிறது.
- பவுர்ணமி திதி: அக்டோபர் 06 ஆம் தேதி காலை 11.43 மணி முதல் அக்டோபர் 07 ஆம் தேதி காலை 09.50 மணி வரை.
- கிரிவலம் செல்வதற்கு ஏற்ற நேரம்: அக்டோபர் 06 ஆம் தேதி பகல் 12.23 மணி துவங்கி, அக்டோபர் 07 ஆம் தேதி காலை 09.16 மணி வரை.
புரட்டாசி பவுர்ணமி கிரிவலத்தின் ஜோதிட சிறப்பு
இது புரட்டாசி பவுர்ணமி என்பதால் அக்டோபர் மாதம் தனிச்சிறப்பு வாய்ந்ததாக கருதப்படுகிறது. சந்திரனுக்குரிய திங்கட்கிழமையில் புரட்டாசி மாதம் பவுர்ணமி வருவது இன்னும் விசேஷமானதாகும். அதோடு கூடுதல் சிறப்பாக இந்த மாத பவுர்ணமி, உத்திரட்டாதி நட்சத்திரத்தில் வருகிறது. உத்திரட்டாதி நட்சத்திரத்திற்குரிய தெய்வம் சிவ பெருமான் ஆவார். சிவ வழிபாட்டிற்குரிய உத்திரட்டாதி நட்சத்திரம், திங்கட்கிழமையில் அக்டோபர் மாத பவுர்ணமி வருவது மிக மிக சிறப்பு வாய்ந்தது ஆகும்.
கிரிவலம் வருவதால் கிடைக்கும் முக்கிய பலன்கள்
- பாவங்கள் நீங்கும்: திங்கட்கிழமையில் திருவண்ணாமலையில் கிரிவலம் செல்வதால் பாவங்கள் நீங்கி, புண்ணியங்கள் சேரும்.
- இந்திர பதவி: செல்வம், செழிப்பு, தெய்வீக ஆற்றல் மற்றும் அருள் ஆகியவை அதிகரிக்கும்.
- ஆரோக்கியம்: உடல் மற்றும் மன ஆரோக்கியம் சிறப்பாக இருக்கும்.
- மன அமைதி: மன அழுத்தம் குறைந்து, ஆழ்ந்த மன அமைதி கிடைக்கும், ஆன்மீக வளர்ச்சி பெருகும்.