நெல்லிக்காய் சமீப வருடங்களாக எல்லோரும் உணவில் சேர்க்க தொடங்கி இருக்கிறார்கள். எனினும் இதன் புளிப்பு சுவையால் குழந்தைகள் மற்றும் வயதானவர்கள் இதை தவிர்த்துவிடுவதும் உண்டு. புளிப்பு சுவையை விரும்பாதவர்கள் கூட ரசம் போன்ற புளிப்பு உணவுகளில் நெல்லிக்காயை சேர்த்து வரலாம். பாரம்பரியமாகவே அன்றாடம் ரசம் உணவில் சேர்த்து வருகிறோம். நோய் எதிர்ப்பு சக்தியை அதிகரிக்கும் இந்த நெல்லி ரசத்தை எப்படி செய்வது என்பதை இங்கு தெரிந்துகொள்வோம்.
நெல்லி ரசம் செய்ய தேவையான பொருள்கள்
- நெல்லிக்காய்: 3-5 (கொட்டைகள் நீக்கிவிடவும்)
- மஞ்சள் தூள்: கால் டீஸ்பூன்
- கருப்பு மிளகு: 1 டீஸ்பூன் அல்லது காரத்துக்கேற்ப
- சீரகம்: 1 டீஸ்பூன் அல்லது தேவைக்கேற்ப
- ரசப்பொடி: 1 டீஸ்பூன்
- உப்பு: தேவைக்கு
- கொத்துமல்லித்தழை: தேவைக்கு
- பெருங்காயம்: கால் டீஸ்பூன்
- தாளிக்க: கடுகு - கால் டீஸ்பூன், வரமிளகாய் - 2, கறிவேப்பிலை - சிறிதளவு, எண்ணெய் - தேவைக்கு
நெல்லி ரசம் தயாரிக்கும் முறை
- நெல்லிக்காய், வர மிளகாய் போன்றவற்றை தண்ணீர் சேர்த்து வேகவிடவும். நெல்லிக்காய் மசியும் வரை வேகவிடவும்.
- வேகவைத்த நெல்லிக்காயை எடுத்து, மிளகு, சீரகம் இரண்டையும் பொடித்து, மசித்த நெல்லிவிழுதில் சேர்த்து, மஞ்சள் தூளையும் சேர்க்கவும்.
- ஒரு வாணலியில் எண்ணெய் சேர்த்து, கடுகு, வரமிளகாய், கறிவேப்பிலை ஆகிய தாளிப்பு பொருட்களை சேர்த்து வதக்கவும்.
- பிறகு அரைத்து வைத்த நெல்லி விழுதை சேர்த்து, தேவையான அளவு தண்ணீர் சேர்க்கவும்.
- கலவை கொதிக்கும் போது ரசப்பொடி, உப்பு, பெருங்காயம் சேர்த்து, அடுப்பிலிருந்து இறக்கி, கொத்துமல்லித்தழை தூவி பரிமாறவும்.
சுவையான மற்றும் நோய் எதிர்ப்பு சக்தியை அதிகரிக்கும் நெல்லி ரசம் தயார்! குழந்தைகளுக்கு தேவையெனில் பருப்பு சேர்த்து பருப்பு ரசமாக்கி கொடுக்கலாம். இதை சூப் போன்றும் குடிக்கலாம்.
நெல்லிக்காய் பருவகால நோய்களை எப்படி தடுக்கிறது?
நெல்லிக்காய் தினமும் உணவில் சேர்த்துக்கொள்ளலாம். இது நோய் எதிர்ப்பு சக்திக்கு நன்மை செய்யக்கூடியது. இதில் உள்ள வைட்டமின் சி, உடலில் தொற்றுக்கிருமிகளை எதிர்த்து போராட உதவுகிறது. இதன் ஆன்டி-இன்ஃப்ளமேட்டரி மற்றும் ஆண்டி மைக்ரோபியல் பண்புகள் சளி, காய்ச்சல், இருமல், தொண்டை தொற்று போன்ற அபாயத்தை தடுக்க உதவும். மழைக்காலம் நெருங்கும் நிலையில் தொற்று தடுக்க நெல்லி சேர்ப்பது அவசியம். நெல்லிக்காய் நார்ச்சத்து கொண்டதால் இது செரிமானத்தை மேம்படுத்தி மலச்சிக்கலை கட்டுப்படுத்தும்.
நெல்லிக்காய் இதர நன்மைகள் என்னென்ன?
- இதய ஆரோக்கியம்: நெல்லிக்காய் கொலஸ்ட்ரால் அளவை குறைக்கும். உடலில் ட்ரைகிளிசரைடுகள் குறைக்கும் இதனால் இதய ஆரோக்கியம் பாதுகாக்கப்படுகிறது.
- நீரிழிவு கட்டுப்பாடு: நீரிழிவு நோயாளிகள் நெல்லிக்காயை சேர்த்து வரலாம். இது லோ கிளைசெமிக் இண்டெக்ஸ் கொண்டது என்பதோடு இரத்த சர்க்கரை அளவை கட்டுப்படுத்தவும் செய்கிறது. நீரிழிவு நோயாளிகளுக்கு இன்சுலின் உணர்திறன் மேம்படுத்த செய்கிறது.
- நச்சு நீக்கம்: நெல்லிக்காய் உடல் மற்றும் கல்லீரல் நச்சு நீங்க உதவும் ஒரு சிறந்த உணவு.
- கண் பார்வை: இதில் இருக்கும் வைட்டமின் ஏ கண் பார்வையை மேம்படுத்தும். நெல்லிக்காய் அடிக்கடி உணவில் சேர்த்து வந்தால் வயது காரணமாக ஏற்படும் மாகுலர் சிதைவு தடுக்க செய்யும்.
- இளமை தோற்றம்: நெல்லிக்காய் இளவயதில் முதுமை தோற்றத்தை தடுக்கும் தன்மை கொண்டது.
இந்திய நெல்லிக்காய் மருத்துவ குணங்கள் குறித்த ஆய்வு
நெல்லிக்காய் ஆயுர்வேத மருத்துவத்தில் மிக முக்கியமான இடத்தைப் பெறுகிறது. நெல்லிக்காய் பல நோய்களுக்கு மருந்தாகப் பயன்படுகிறது. இதை தனியாகவோ அல்லது மற்ற மூலிகைகளுடன் சேர்த்தோ பயன்படுத்தலாம். காய்ச்சல், சளி, சிறுநீர் பிரச்சனை, மலச்சிக்கல், கல்லீரல் கோளாறுகள், வயிற்றுப் புண் போன்ற பல நோய்களுக்கு இது நிவாரணம் அளிக்கிறது. மேலும், இது உடல் வலிமைக்கும், ஜீரண சக்திக்கும் உதவுகிறது.
ஆய்வுகளின்படி, நெல்லிக்காய் காய்ச்சலைக் குறைக்கும், வலியைப் போக்கும், இருமலைக் கட்டுப்படுத்தும். இது ஒரு சிறந்த ஆன்டி ஆக்ஸிடண்ட்டாகவும், நோய் எதிர்ப்பு சக்தியை அதிகரிக்கும் பொருளாகவும் செயல்படுகிறது. இது குறித்து மேலும் ஆராய்ச்சிகள் தேவை.
நெல்லிக்காய் பக்கவிளைவுகள் உண்டு செய்யுமா?
நெல்லிக்காய் உணவாக சேர்த்து எடுக்கும் போது பெரும்பாலும் பக்கவிளைவுகள் உண்டு செய்யாது. எனினும் இது நன்மை செய்யும் என்று அளவுக்கு அதிகமாக சாப்பிடக்கூடாது. குறிப்பாக அமில ரிஃப்ளக்ஸ், அல்சர் போன்ற இரைப்பை பிரச்சனை, குடல் பிரச்சனை கொண்டவர்கள் நெல்லிக்காயை மிதமாக சேர்க்க வேண்டும். சர்க்கரை அளவு குறைவாக இருப்பவர்கள் நெல்லிக்காய் சேர்க்கும் போது கவனமாக இருக்க வேண்டும். இது சர்க்கரை அளவை மேலும் குறைக்கலாம். அமிர்தமே ஆனாலும் அளவாக எடுப்பது பாதுகாப்பானது.
அடிக்கடி கேட்கப்படும் கேள்விகள் (FAQ)
பொறுப்பு துறப்பு: இந்த கட்டுரையில் வழங்கப்பட்டுள்ள தகவல்கள் பொதுவான நோக்கங்களுக்காக மட்டுமே. மருத்துவ ஆலோசனை, நோயறிதல் அல்லது சிகிச்சைக்கு மாற்றாக இல்லை. மேலும் விவரங்களுக்கு எப்போதும் மருத்துவரை அணுகவும். இங்கு வழங்கப்பட்ட தகவலின் துல்லியம், நம்பகத்தன்மைக்கு Jothidam360 பொறுப்பேற்காது.