கருட பகவானின் அருளைப் பெறும் கருட பஞ்சமி விரதம் மற்றும் அதன் பலன்கள் குறித்து இந்த ஜோதிடக் கட்டுரையில் விரிவாகக் காணலாம். ஆடி மாதத்தில் வரும் கருட பஞ்சமி அன்று கருடனை வழிபடுவது மகா விஷ்ணுவின் அருளைப் பெற்றுத் தரும் என்பது ஐதீகம். நாக தோஷங்கள் நீங்கவும், குழந்தை பாக்கியம் பெறவும், ஆரோக்கியம் மேம்படவும் கருட பஞ்சமி வழிபாடு மிகவும் முக்கியம்.
கருட பஞ்சமி சிறப்புகள் மற்றும் முக்கியத்துவம்
கருடனை வழிபடுவதும், கருட வாகனத்தில் பெருமாளை தரிசனம் செய்வதும் மிகப் பெரிய புண்ணியமாக பார்க்கப்படுகிறது. ஆடிச் செவ்வாய்கிழமையில் வரும் கருட பஞ்சமி அன்று கருடனை வழிபட்டால் நமக்கு என்னென்ன பலன்கள் கிடைக்கும் என்பதை தெரிந்து கொள்ளலாம்.
கருடன் பிறந்த தினம் கருட பஞ்சமி என்று அழைக்கப்படுகின்றது. நாக தோஷம் போக்கும் ஆற்றல் கொண்டது கருட பஞ்சமி விரதம். அதே போல் பிள்ளை வரம் தரும் கருட ஹோமம். கருடனை நினைத்து திருமணமான பெண்கள் விரதம் இருந்தால் நாகதோஷம் நீங்குவதோடு, கருடனைப் போல புத்திமானாகவும் வீரனாகவும் பிள்ளைகள் பிறப்பார்கள். விபத்து நோய் நீக்கும் மருத்துவராகவும், பஞ்ச பக்ஷியின் ராஜாவாகவும் திகழ்பவர் ஸ்ரீ கருட பகவான். மற்றவர்களுக்கு தீங்கிழைப்பவர்கள், தாங்கள் செய்த தீமையின் பலனை இறந்த பின்பு அனுபவிப்பார்கள். எந்தத் தவறுக்கு என்ன தண்டனை என்பதை கருடனுக்கு மஹாவிஷ்ணு போதித்ததே 'கருட புராணம்' ஆகும்.
கருடனின் சிறப்புகள் மற்றும் வேறு பெயர்கள்
மங்களாலயன், பக்ஷிராஜன், சுபர்ணன், புஷ்பப்பிரியன், வினதைச் சிறுவன், வேத ஸ்வரூபன், வைனதேயன் என்ற பல்வேறு பெயர்களை கொண்டு அழைக்கப்படும் கருட பகவான் கஷ்யபர், விநதை தம்பதிக்கு இரண்டாவது மகனாக ஆடி மாத சுவாதி நட்சத்திரத்தில் பிறந்தவர். இவருக்கு ருத்ரை மற்றும் சுகீர்த்தி என்னும் இரண்டு மனைவியர் உள்ளனர்.
கருடனை பெரிய திருவடி என்றும், கருடாழ்வார் என்றும் வைணவ தலங்களில் பக்தர்கள் போற்றுவது உண்டு. இவர் அவதரித்த, தனது தாயையும் வம்சத்தையும் அடிமைத்தனத்தில் இருந்த மீட்ட திருநாள் கருட பஞ்சமியாக கொண்டாடப்படுகிறது. இந்த ஆண்டு இன்னும் சிறப்புமிக்கதாக ஆடி செவ்வாயுடன் இணைந்து கருட பஞ்சமி அமைந்துள்ளது. ஆடி இரண்டாவது செவ்வாய் கிழமையில் அம்பிகையுடன் கருடனையும், நாகர்களையும் வழிபடுவது மிகவும் சிறப்பு.
கருடன் தரிசனத்தின் சிறப்பு
கருடன், மங்கள வடிவமானவன், பஷிராஜன். அதாவது பறவைகளின் அரசன். கருடனைத் தரிசிப்பது சுப சகுனம். ஆகாயத்தில் கருடன் வட்டமிடுவதோ, குரலெழுப்புவதோ நல்லதொரு அறிகுறி. இன்றும் கும்பாபிஷேகத்தின் போது எத்தனை விதமான பூஜைகள், யாகங்கள் நடந்தாலும் பூஜையின் போது கருடன் வந்து தரிசனம் தந்தால் தான் கும்பாபிஷேகமே முழுமை பெறுகிறது. கருடனைத் தரிசிக்கும்போது நம் மனம் நிறைவடைகிறது. ஸ்ரீமந் நாராயணன் எத்தனை விதமான வாகனத்தில் தரிசனம் தந்தாலும் கருட வாகனத்தில் தரிசனம் தருவதே தனிச்சிறப்பு ஆகும். திருமலை திருப்பதியில் கூட கருடோத்ஸவம் மிகவும் பிரசித்தி பெற்றது. ஸ்ரீகருடாழ்வர் எல்லா கோவில்களிலும் அழகுடன் சிறப்பாக காட்சி தருகிறார். விஷ ஜந்துக்களால் ஏற்படும் ஆபத்துக்களை தவிர்க்கும் வகையிலும், பஞ்சபக்ஷி தோஷங்கள், சர்ப்ப தோஷங்கள் போன்றவைகளால் ஏற்படும் தடைகளை விலக்கும் விதமாக இவருக்கு சுவாதி நட்சத்திரத்தில் கருட ஹோமம் செய்து அபிஷேகம் செய்த தேனை பருகுவதால் பக்ஷி தோஷங்கள் நீங்கும். வாகன விபத்துகள் ஏற்பட்டவர்களுக்கு விரைவில் குணமாகும்.
கருட ஹோமம் மற்றும் அதன் பலன்கள்
விபத்து நோய் நீக்கும் மருத்துவராகவும், பஞ்ச பக்ஷியின் ராஜாவாகவும் திகழும் கருடாழ்வாருக்கு கருட ஹோமம், கருட யாகமும் நடத்தப்படும். இவருக்கு தேன் அபிஷேகம் செய்தால் பாவங்கள், நோய்கள் அகலும். குடும்ப நலம், தைரியம் ஏற்படவும், எதிரிகள் தொல்லை அகலவும், நீண்ட ஆயுள், பண வரவு ஏற்படவும், ஸர்ப்ப தோஷம், ராகு கேது திசா புக்திகளால் ஏற்படும் துன்பங்கள், விபத்து, மரண பயங்கள், புத்தி பேதலிப்புகள், சர்ம வியாதிகள், ஆறாத புண்கள், கட்டிகள் விலகவும், துர் ஆவிகள் பாதிப்புக்களில் இருந்து விலகவும், இரத்த புற்று நோய், எலும்பு புற்றுநோய், போன்ற பலவிதமான புற்று நோய்கள், பித்ரு, பிரம்மஹத்தி தோஷங்கள், பரம்பரை பரம்பரையாக வரும் பூர்வ தோஷங்கள், கால சர்ப தோஷங்கள், பில்லி, சூன்யம், ஏவல், சத்ரு தொல்லைகள், தீராத நோய் நீங்கவும், மறு பிறவியற்ற நிலையை அடையவும், குடும்பத்தில் சுபிட்சம் உருவாகவும், பிறக்கும் குழந்தைகள் அறிவும் வீரமும் உடையவர்களாக விளங்கவும், ஆரோக்கியத்தில் முன்னேற்றம் ஏற்படவும் கருட ஹோமம் கருட யாகமும் நடைபெறுகிறது.
கருட பஞ்சமி அன்று என்ன செய்ய வேண்டும்?
- கருட பஞ்சமி தினத்தன்று காலையில் எழுந்து குளித்து முடித்ததும் அருகிலுள்ள பெருமாள் கோவிலுக்கு சென்று கருட பகவான் சன்னதியில் தீபம் ஏற்றி வழிபட வேண்டும்.
- முடிந்தால் கருடபகவானுக்குரிய மந்திரங்களான கருடதண்டம், காயத்ரியை 9, 27, 54, 108 என்ற எண்ணிக்கையில் துதித்து வணங்குவது நல்லது.
- பின்பு பெருமாள் மற்றும் தாயாரை வணங்கி கோவிலை மூன்று முறை வலம் வந்து வீடு திரும்பலாம்.
- கருட பஞ்சமி தினத்தில் விரதம் இருந்து பெருமாள் கோயிலுக்கு சென்று கருடாழ் வாரையும், பெருமாளையும் வழிபடுபவர்களுக்கு ஜாதகத்தில் இருக்கின்ற நாக, சர்ப்ப தோஷங்களின் தீவிரத்தன்மை குறைந்து நற்பலன்கள் உண்டாகும்.
ஜோதிட ரீதியாக, கருட பஞ்சமி நாளில் செய்யும் வழிபாடு ராகு-கேது தோஷங்களுக்கும் நல்ல பரிகாரமாக அமையும்.
கருட பஞ்சமி வழிபாட்டு பலன்கள்
- வீட்டில் விஷப்பாம்புகள், பூச்சிகள் போன்றவை நுழையாமல் தடுக்கும்.
- கண் திருஷ்டிகள், துஷ்ட சக்தியின் பாதிப்புகள் போன்றவை ஒழியும்.
- மனதிற்கு இனிய வாழ்க்கை துணை, நிறைவான செல்வம், புகழ் கிடைக்கப் பெறுவார்கள்.
- உடலில் விஷ பொருட்களால் ஏற்பட்ட நோய் பாதிப்புகள் நீங்கி உடல் பழைய நிலையை அடையும்.
- எதையும் சாதிக்கக் கூடிய தன்னம்பிக்கை மற்றும் மனோதிடம் உண்டாகும்.
- வீட்டில் நாகர் விக்ரஹம் மற்றும் கருடன் விக்ரஹம் இருந்தால் அபிஷேகம் செய்ய வேண்டும். தூப தீபம் காட்டி நைவேத்தியம் செய்து ஒரு சாஷ்டாங்க நமஸ்காரம் செய்யுங்கள். இப்படி செய்வதால் கருடன் மற்றும் ஆதிசேஷனின் பரிபூரண அருளைப் பெறலாம். சர்வ மங்களம் உண்டாகும்.
கருட காயத்ரி மந்திரம்
ஓம் தத் புருஷாய வித்மஹே ஸ்வர்ண பஷாய தீமஹி தந்நோ கருட ப்ரசோதயாத்.
கருடனை ஆகாயத்தில் பார்த்தால் வலது கை மோதிர விரலால் கன்னத்தில் தொட்டு கீழ்க்கண்ட மந்திரத்தை சொல்லுங்கள்:
குங்குமாங்கித வர்ணாய குந்தேந்து தவளாயச விஷ்ணு வாஹன நமஸ்துப்யம் பஷி ராஜாயதே நமஹ.
அடிக்கடி கேட்கப்படும் கேள்விகள் (FAQ)
கருடன் பிறந்த தினமே கருட பஞ்சமி என்று கொண்டாடப்படுகிறது. ஆடி மாதத்தில் வரும் இந்த நாள், நாக தோஷ நிவர்த்திக்கும், குழந்தை பாக்கியம் பெறவும் சிறந்தது.
கருட ஹோமம் நாக தோஷங்கள், சர்ப்ப தோஷங்கள், ராகு-கேது திசை பாதிப்புகள், விபத்து பயங்கள், நோய்கள் மற்றும் பிற குடும்ப பிரச்சனைகளில் இருந்து விடுதலை பெற செய்யப்படுகிறது.
அன்று காலையில் பெருமாள் கோவிலுக்குச் சென்று கருட பகவானை வழிபட்டு, தீபம் ஏற்றி, மந்திரங்கள் துதித்து விரதம் இருந்தால் நாக தோஷங்கள் நீங்கும்; புத்திமான்கள் பிறப்பார்கள்.