ஆலிவ் எண்ணெய் பல அழகு சாதனப் பொருட்களில் பயன்படுத்தப்பட்டாலும், அதை நேரடியாக முகத்தில் பயன்படுத்துவது பாதுகாப்பானதா? சரும நிபுணர் டாக்டர் ஸ்வேதா ராகுல் தரும் தெளிவான விளக்கத்தைப் பார்ப்போம்.
ஆலிவ் ஆயில் மற்றும் சரும பராமரிப்பு
ஆலிவ் எண்ணெய் ஃபேஸ் வாஷ், பாடி வாஷ், சோப்பு லோஷன் போன்ற பல பொருள்களில் மூலப்பொருளாகவே பயன்படுத்தப்படுகிறது. ஸ்க்ரப் செய்யவும், ஃபேஸ் மாஸ்க் போன்றவற்றிலும் இவை பயன்படுத்தப்படுகின்றன. ஹைப்பர் பிக்மெண்டேஷன் மற்றும் கண் ஒப்பனைகளை நீக்க இவை வீட்டு வைத்தியமாக பயன்படுத்தப்பட்டு வருகிறது. ஆனால், முகம் அழகாக மாற ஆலிவ் எண்ணெயை தனித்து முகத்தில் பயன்படுத்தலாமா?
டாக்டர் ஸ்வேதா ராகுல் தரும் விளக்கம்
சரும பராமரிப்பு மருத்துவர் ஸ்வேதா ராகுல், முகத்திற்கு ஆலிவ் எண்ணெய் ஏற்றதல்ல என்று கூறுகிறார். பலரும் முகம் அழகாக இருக்க ஆலிவ் எண்ணெய் பயன்படுத்துவதைப் பார்க்க முடிகிறது. ஆனால், முகத்திற்கு ஆலிவ் எண்ணெய் கண்டிப்பாகப் பயன்படுத்தக் கூடாது என்று அவர் வலியுறுத்துகிறார்.
ஆலிவ் ஆயில் விலை அதிகம் என்பதால் பலரும் இது சருமத்திற்கு அதிக நன்மை கொடுக்கும் என்று நினைக்கிறார்கள். ஆனால் ஆலிவ் ஆயில் சருமத்திற்கு நல்லது கிடையாது என்கிறார் டாக்டர் ஸ்வேதா ராகுல். பிறந்த குழந்தைக்கு மசாஜ் செய்வதற்கும் கூட சிலர் ஆலிவ் ஆயில் பயன்படுத்துகிறார்கள், இதுவும் தவறு என்று அவர் குறிப்பிடுகிறார்.
ஆலிவ் ஆயில் சருமத்திற்கு செய்யும் கெடுதல்கள்
ஆலிவ் ஆயிலில் ஒலியிக் அமிலம் (Oleic acid) என்னும் கொழுப்பு அமிலம் உள்ளது. இது சருமத்தில் சேரும்போது சருமத்தை சேதப்படுத்துகிறது. சருமத்தில் இருக்கும் நீர்ச்சத்தை குறைத்து, முகத்தில் சிவப்பு நிற ரேஷஷ் மற்றும் எரிச்சலை ஏற்படுத்தும். அதனால், ஆலிவ் ஆயில் போடுவதன் மூலம் சருமம் மினுமினுப்பாக இருக்கும் என்று நினைப்பவர்கள் அதை பயன்படுத்த வேண்டாம் என்று டாக்டர் ஸ்வேதா ராகுல் அறிவுறுத்துகிறார்.
ஆய்வுகள் சொல்வது என்ன?
- 2013 ஆம் ஆண்டு ஆய்வு ஒன்றில், ஆலிவ் எண்ணெய் வறண்ட சருமத்திற்கு பயன்படுத்துவதை ஊக்குவிக்கக் கூடாது என்று தெரிவிக்கப்பட்டுள்ளது. இது சருமத்தின் வெளிப்புற அடுக்கில் சிவத்தல் மற்றும் சேதத்தை உண்டு செய்யும் என்கிறார்கள் ஆராய்ச்சியாளர்கள்.
- குழந்தைகளுக்குப் பயன்படுத்தும்போது இது தோலழற்சியை ஏற்படுத்தும் என்று 2016 ஆம் ஆண்டு மேற்கொண்ட ஆராய்ச்சி தெரிவித்துள்ளது.
முகத்திற்கு எந்த எண்ணெய் பயன்படுத்தலாம்?
முகத்தில் எண்ணெய் போடுவதன் மூலம் முகம் அழகாக மாறும் என்பதற்கு அறிவியல் பூர்வமான ஆராய்ச்சிகள் எதுவும் இல்லை என்று டாக்டர் ஸ்வேதா ராகுல் கூறுகிறார். மேலும், முகத்திற்கு எண்ணெய் பயன்படுத்த வேண்டும் என்றால் தேங்காய் எண்ணெய் பயன்படுத்தலாம். நமது தட்பவெப்பநிலைக்கு ஏற்ற சிறந்த எண்ணெய் தேங்காய் எண்ணெய் என்பதோடு, இது சருமத்திற்கும் நன்மை செய்யுமாம்.