வெண்பூசணி இளநீர் சாறு: அற்புத ஆரோக்கிய நன்மைகள்

உடலில் உள்ள கழிவுகளை முறையாக வெளியேற்றும்போது தான் உடல் ஆரோக்கியத்துடன் இருக்கும். கொழுப்புகள், திரவக் கழிவுகள் ஆகிய அனைத்தும் சரியாக வெளியேறும்போது தான் உடல் இலகுவாகவும் முழு ஆரோக்கியத்துடனும் இருக்கும். இதற்கு சமீப காலங்களில் டீடாக்ஸ் பானங்கள் என்கிற பெயரில் விதவிதமான பானங்கள் இருக்கின்றன. ஆனால் காலங்காலமாக நம் முன்னோர்கள் குடித்து வந்த, கொலஸ்டிரால் முதல் குடல் கழிவுகள் வரை அத்தனையும் சுத்தம் செய்து, உடலையும் குளிர்ச்சியாக வைத்திருக்கும் சூப்பர் பானம் தான் இந்த வெண்பூசணி சாறு. அதோடு கொஞ்சம் இளநீரும் சேர்த்து குடித்தால் நிறைய மாற்றங்கள் உடலில் நடக்குமாம். வாருங்கள் அவை என்னென்னனு பார்த்திடலாம்.

வெண்பூசணியின் ஆரோக்கிய நன்மைகள் என்னென்ன?

• நீர்ச்சத்து நிறைந்தது: வெண்பூசணி என்றாலே நீர்ச்சத்து நிறைந்த காய். கிட்டத்தட்ட 95 சதவீதத்துக்கும் மேல் தண்ணீர்ச்சத்து இருக்கிறது. உடலில் உள்ள கழிவுகளை நீக்கி உடலை டீடாக்ஸ் செய்யும்.

• குறைந்த கலோரிகள்: வெண்பூசணியில் கலோரிகள் அளவு மிக மிகக் குறைவு. குறைந்த அளவு சர்க்கரையும் கார்போஹைட்ரேட்டும் இருப்பதால் இதன் சாறை குடித்ததும் உடனடியாக உடலுக்கு எனர்ஜி கிடைக்கும்.

• நார்ச்சத்துக்கள்: வெண்பூசணியில் நார்ச்சத்துக்கள் நிறைந்து இருக்கிறது. இது செரிமான ஆற்றலையும் உடலின் வளர்சிதை மாற்றத்தையும் மேம்படுத்த உதவுகிறது. அதோடு நீண்ட நேரம் உங்களை நிறைவாக வைத்திருக்கும்.

• காரத்தன்மை கொண்டது: வெண்பூசணி இயற்கையாகவே காரத்தன்மை கொண்டிருக்கிறது. வைட்டமின் சி அதிகமாக இருக்கிறது. இது உடலின் அமிலத்தன்மையை சமநிலைப்படுத்தும். உடலில் ஏற்படும் இன்ஃப்ளமேஷன்களைக் குறைக்கும்.

வெண்பூசணி இளநீர் பானம் குடிப்பதன் நன்மைகள் என்ன?

வெண்பூசணி இளநீர் பானம் குடிப்பதன் மூலம் ஏராளமான ஆரோக்கிய நன்மைகள் நமக்குக் கிடைக்கும். வெண்பூசணியில் 95 சதவீதம் வெறும் தண்ணீர்ச்சத்து தான் இருக்கிறது. இது உடலை நன்கு ஹைட்ரேட்டிங்காக வைத்திருக்கச் செய்யும்.

• உடலின் நீர் சமநிலை: இளநீரில் இயற்கையாகவே எலக்ட்ரோலைட்டுகள் அதிகமாக இருக்கின்றன. இவையிரண்டும் சேரும்போது உடலின் நீர் சமநிலையை சீராக்கும்.

• எடை குறைப்பு: இளநீர் மற்றும் வெண்பூசணி ஆகிய இரண்டுமே மிக மிகக் குறைந்த கலோரிகள் கொண்டிருப்பதால் இது உடல் எடையைக் குறைக்கவும் உதவி செய்யும். அதேசமயம் கார்போஹைட்ரேட்டும் கொண்டிருக்கிறது.

• சரும ஆரோக்கியம்: இந்த பானத்தில் உள்ள நீர்ச்சத்தானது சரும ஆரோக்கியத்தை மேம்படுத்தும். செல்களில் நீரேற்றம் அதிகரிக்கச் செய்து ரத்தம் மற்றும் ஆக்சிஜனின் ஓட்டத்தை உடலில் மேம்படுத்தும்.

• குடல் ஆரோக்கியம்: இந்த பானம் உங்கள் உடலைக் குளிர்ச்சியாக்கும். அதோடு இதிலுள்ள நார்ச்சத்துக்கள் குடல் ஆரோக்கியத்தையும் மேம்படுத்தும். அது வயிறு உப்பசத்தைக் குறைத்து செரிமானத்தையும் மேம்படுத்தும்.

வெண்பூசணி இளநீர் பானம் தயார் செய்வது எப்படி?

இந்த சூப்பர் பானம் செய்வது மிக மிக எளிது. முதலில் வெண்பூசணியை தோல் சீவி கழுவி, சிறு சிறு துண்டுகளாக நறுக்கி எடுத்துக் கொள்ளுங்கள். விதைகளை நீக்கியும் பயன்படுத்தலாம். அப்படியே விதையுடனும் பயன்படுத்தலாம். இந்த வெண்பூசணி துண்டுகளை ஒரு பிளண்டரில் சேர்த்துக் கொள்ளுங்கள். அதோடு ஒரு இளநீரின் தண்ணீரைச் சேர்த்துக் கொள்ளுங்கள். இப்போது நன்கு பிளண்ட் செய்து எடுத்தால் வெண்பூசணி - இளநீர் பானம் தயார். வெயில் காலத்தில் வழக்கமான தண்ணீருக்கு பதிலாக இந்த பானத்தைக் குடிக்க உடல் குளிர்ச்சியாகும்.

வெண்பூசணி - இளநீர் ஜூஸ் குடிக்க சிறந்த நேரம் எது?

இந்த வெண்பூசணி இளநீர் பானத்தை எப்போது குடிக்க வேண்டும் என்கிற சந்தேகம் உங்களுக்கு வரலாம். காலை நேரத்தில் இந்த ஜூஸைக் குடிப்பது சிறந்தது. அதேசமயம் ஒரு நாளைக்கு ஒரு கிளாஸ் அளவு மட்டும் குடிப்பது நல்லது. சிறந்த பலன்களைப் பெற குறைந்தபட்சம் 15 நாட்களாவது இதை குடிப்பது நல்லது. மேலும் இதுபோன்ற பயனுள்ள தகவல்களுக்கு இங்கு தொடர்ந்து இணைந்திருங்கள்.

இறுதியாக, இந்த இளநீர் வெண்பூசணி சாறு ஊட்டச்சத்துக்கள் நிறைந்தது. குறிப்பாக எலக்ட்ரோலைட்டுகளை உடலுக்குக் கொடுக்கும். உடனடி எனர்ஜியும் கிடைக்கும். அதேசமயம் நீரிழிவு, சைனஸ் பிரச்சினை ஆகிய பிரச்சினைகள் உள்ளவர்கள் மருத்துவ ஆலோசனையின்றி இந்த ஜூஸை எடுத்துக் கொள்ள வேண்டாம்.