சிதம்பரம் நடராஜர் ஆலயத்தில் அர்த்தஜாம பூஜை மற்றும் அர்த்தஜாம அழகர் சிறப்பு

சிதம்பரம் அர்த்தஜாம பூஜை: ஒரு சிறப்பம்ச பார்வை

சைவத்தில் ஆலயம் என்றால் அது சிதம்பரத்தையே குறிக்கும். சிவ பெருமானின் பஞ்ச சபைகளில் சிதம்பரத்தை பொற்சபை அல்லது பொன்னம்பலம் என்று அழைப்பார்கள். நடராஜர் மூலவராக காட்சி தரும் வெகு சில ஆலயங்களில் சிதம்பரமும் ஒன்று. பஞ்சபூத தலங்களில் இது ஆகாயத்திற்குரிய தலமாக போற்றப்படுகிறது. சைவத்தின் தலைநகராக கொண்டாடப்படும் சிதம்பரத்தில் அர்த்தஜாம பூஜை மிக தாமதமாக, அனைத்து சிவாலயங்களிலும் அர்த்தஜாம பூஜை முடிந்த பிறகு இரவு 10 மணிக்கு மேல் நடைப்பெறும். இதனைக் கண்டால் அனைத்து சிவாலயங்களிலும் அர்த்தஜாம பூஜை கண்ட பலன் கிடைக்கும் என்பது நம்பிக்கை.

அனைத்து கோயில்களிலும் அர்த்தஜாம பூஜை முடிந்ததும் பைரவ மூர்த்திக்கு வழிபாடு நடத்தப்படும். அவருடைய வழிபாட்டுடன் அன்றைய பூஜை முடிந்ததாகக் கருதப்பட்டு, கோயில் நடை சாத்தப்படும். அப்படி மூடப்படும் கோயில் நடை, அடுத்த நாள் காலையில் மட்டுமே திறக்கப்பட வேண்டும் என்பது ஆகம விதி. ஆனால் சிதம்பரத்தில் நடராஜர் பள்ளியறை சேர்ந்த பின் பிரம்ம சண்டிகேஸ்வரர், பைரவ வழிபாட்டுக்குப் பிறகு, அர்த்தஜாம அழகர் எனப்படும் க்ஷேத்திர பாலகன் பூஜிக்கப்படுகிறார்.

அர்த்தஜாம அழகர்: வரலாறு மற்றும் மகிமை

ஒரு ஜோதிடன் ஒருவன் பலரது சாபத்தால் மறுபிறவியில் பல்லியாகப் பிறந்தான். அப்படி அவன் பிறந்த இடம் சிதம்பரம். சித்சபையின் கொடுங்கைகளில் வசித்த பல்லிக்கு புண்ணியவசத்தால் சிவ பக்தி உண்டானது. நடராஜப் பெருமானின் திருவருள் கைகூடியது. அழகிய சிவகணமாகும் பேறு கிடைத்தது. கோயிலை இரவில் காக்கும் வேலையும் கிடைக்கப் பெற்றது. அவரே அர்த்தஜாம அழகர் என்று அழைக்கப்படுகிறார்.

சித்சபையின் ஈசான பாகத்தில் தேவ சபையின் மேற்குச் சுவரில் அமைந்துள்ள மாடத்தில், சித்சபையை நோக்கியவாறு அர்த்தஜாம அழகர் காட்சி தருகிறார். சித்சபையின் கூரையில் பிரம்ம சண்டிகேஸ்வரரின் சந்நிதிக்கு அருகில் அந்த பல்லியும் பொறிக்கப்பட்டுள்ளது. அர்த்தஜாம அழகர், ஈஸ்வர அம்சம் என்றும், பைரவ அம்சம் என்றும், துவாரதேவதா அம்சம் என்றும், தர்மராஜர் அம்சம் என்றும் பலவித கருத்துக்கள் உண்டு.

நாள்தோறும் பள்ளியறை பூஜை, பைரவ பூஜையைத் தொடர்ந்து, அர்த்தஜாம அழகருக்கு வழிபாடு நடைபெறும். அப்போது மணம் பொருந்திய தாம்பூலத்தை நைவேத்தியம் செய்வார்கள். இவர் பல்லி வடிவில் வழிபட்ட ஈஸ்வரன், பல்லிகேஸ்வரர் என்ற பெயரில் இரண்டாம் பிராகாரத்தில் தட்சிணா மூர்த்திக்கு அருகில் எழுந்தருளியுள்ளார்.