ஆடிப்பூரம் என்பது அன்னை பராசக்தி அவதரித்த ஒரு முக்கிய திருநாளாகும். இந்த புனிதமான நாளில் அனைத்து அம்பாள் கோவில்களிலும் அம்மனுக்கு சிறப்பு வளைகாப்பு சடங்கு நடைபெறும். இது சைவ, வைணவ பாகுபாடு இல்லாமல், அனைத்து ஆலயங்களிலும் பக்தர்களால் கோலாகலமாக கொண்டாடப்படும் ஒரு விழா.
ஆடிப்பூரம் சிறப்புகள் மற்றும் முக்கியத்துவம்
மாதந்தோறும் பூரம் நட்சத்திரம் வந்தாலும், ஆடியில் வரும் பூரம் நட்சத்திரம் ஆண்டாளின் அவதாரத்தால் மிகவும் விசேஷமானது. விஷ்ணு பக்தையாக வாழ்ந்து, 'சகலமும் அவனே' என அவனுடன் ஐக்கியமான ஆண்டாள் நாச்சியார், ஆழ்வார்கள் வரிசையை அலங்கரித்து பெண் இனத்தின் பெருமையை உலகுக்கு உணர்த்தியவர். இந்த நாளில் அனைத்து உலகத்தையும் படைத்து, காத்து, கரக்கும் அகிலாண்ட கோடி அன்னைக்கு மஞ்சள் காப்பு, சந்தனக்காப்பு, குங்குமக்காப்பு என பல்வேறு சிறப்பு அலங்காரங்களும் பூஜைகளும் நடத்தப்படும். ஜோதிடம் ரீதியாகவும் இந்த நாள் முக்கியத்துவம் வாய்ந்தது.
ஆண்டாள் அவதாரம் மற்றும் திருப்பாவை
ஆடி மாதம், நள வருடம், சுக்ல பட்சம், சதுர்த்தசி திதி, பூரம் நட்சத்திரம், சிம்ம ராசியில், ஆடிப்பூரம் நன்னாளில், "விஷ்ணு சித்தர்" தோட்டத்தில் பூ பறிக்கச் சென்ற போது, ஒளி பொருந்திய குழந்தை ஒன்றை துளசிச் செடியின் கீழ் கண்டார். அக்குழந்தைக்கு "சுரும்பார் பூங்கோதை" என்று பெயரிட்டு வளர்த்தார். இளமையிலேயே இறைவன் கண்ணனின் பெருமைகளை ஆண்டாளுக்கு கூறி, கண்ணன் மீது ஆழ்ந்த பக்தி கொண்ட பெண்ணாக பெரியாழ்வார் வளர்த்தார். ஆண்டாளும் கண்ணன் மீது அளவற்ற பக்தி கொண்டாள். நாளடைவில் அந்த பக்தி காதலாக மாறி, இறைவன் கண்ணனையே மணம் செய்து கொள்ள வேண்டும் என்ற எண்ணத்தையும் வளர்த்துக் கொண்டாள். ஆனந்த வாழ்வு பெற இறைவன் மீது கொண்ட காதலால் "திருப்பாவை" பாடினாள். இன்றும் வைணவத் திருக்கோவில்களில் மார்கழி மாதம் ஆண்டாளின் திருப்பாவை பாடலைக் கேட்டுத் தான் பரந்தாமன் துயிலெழுகிறார்.
ஸ்ரீரங்கம் ரங்கநாதருடன் ஆண்டாள் இரண்டறக் கலந்ததால் விஷ்ணுசித்தர் தன் மகளின் திருமணக் கோலத்தை காண முடியாமல் போனது. பெரியாழ்வார் அரங்கனிடம் மாப்பிள்ளை கோலத்தில் திருவில்லிபுத்தூரில் இருந்து அருள வேண்டும் என்று கேட்டுக் கொண்டதற்கேற்ப இன்றும் திருவில்லிபுத்தூரில் ஆண்டாள்- ரங்கமன்னார் நமக்காக அருள் மழை பொழிந்து கொண்டிருக்கிறார்கள். ஆண்டாள் அவதாரத் தின திருவிழாவையொட்டி ஆடிப்பூரம் தினத்தில் திருத்தேர் இழுத்தல் நிகழ்வுகள் நடைபெறும். இந்த அவதாரத் திருவிழாவை ஒட்டி நடைபெறும் நிகழ்வில் ஆண்டாளைத் தரிசிப்போர் ஆனந்த வாழ்வு பெறுவர் என்பது ஐதீகம். தமிழ் கலாச்சாரத்தில் இந்த நிகழ்வுகள் மிக முக்கியத்துவம் வாய்ந்தவை.
அம்மனுக்கு வளைகாப்பு சடங்கு
உலக உயிர்கள் அனைத்தையும் தன்னுள் அடக்கி வைத்திருக்கும் அன்னைக்கு ஆடிப்பூர நாளில் வளைகாப்பு நடத்தப்படுகிறது. வளைகாப்பு முடிந்ததும் அன்னையை அலங்கரித்த வளையல்கள் அனைத்தும் பெண் பக்தர்களுக்கு பிரசாதமாக வழங்கப்படும். அம்மனுக்கு சாற்றப்பட்ட வளையல்களை வாங்கி அணியும் திருமணமாகாத பெண்களுக்கு விரைவில் திருமணம் நடைபெறும். அதேபோல் திருமணமாகியும் குழந்தைப்பேறு இல்லாத பெண்களுக்கு நல்ல மக்கட்பேறு கிட்டும். ஆடிப்பூர தினத்தில் அம்மன் கோவிலுக்கு சென்று அம்மனுக்கு கண்ணாடி வளையல்கள் வாங்கி அளிப்பது நன்மை மட்டுமின்றி புண்ணியத்தையும் தரும்.
ஆடிப்பூர நன்னாளில் என்ன செய்யலாம்?
- குழந்தை பாக்கியம்: வெகு நாட்கள் குழந்தை இல்லாத தம்பதியினருக்கு வீட்டிலேயே முறைப்படி சந்தனம் மற்றும் குங்குமம் நலங்கு வைத்து பெண்ணின் இரு கைகளிலும் வளையல்களை அணிவித்து முறையாக வளைக்காப்பு செய்வதன் மூலம் அடுத்த வருடமே அவர்களின் இல்லத்தில் ஒரு குழந்தை தவழும் என்பது அனைவராலும் நம்பப்படும் ஒரு ஐதீகமாகும்.
- அம்மன் கோவிலுக்கு: உங்கள் வீட்டிற்கு அருகில் இருக்கும் அம்மன் கோவில்களுக்கு வளையல்கள் வாங்கிக் கொடுத்தும், வளையல்களை கோர்த்து வீட்டில் உள்ள அம்மன் படத்திற்கு மாலையாக சாற்றி, நைவேத்தியம் படைத்து பூஜை செய்வதும் உங்களுக்கு நல்ல பலனைக் கொடுக்கும்.
- சுமங்கலி தானம்: ஏழை சுமங்கலிப் பெண்களுக்கு புடவை, மஞ்சள், குங்குமம், வெற்றிலை பாக்கு, பணம் வைத்து கொடுப்பது மிகவும் நன்மை பயக்கும்.
- மஞ்சள் தாலி: ஆடிப்பூரத்தன்று மஞ்சள் தாலி கட்டிக்கொள்ள தீர்க்க சுமங்கலியாய் இருப்பார்கள் என்பது நம்பிக்கை.
ஆடிப்பூர வழிபாட்டின் நன்மைகள்
அனைத்து கோவில்களிலும் அம்பாளுக்கு வளையல் சாற்றுவார்கள், பக்தர்கள் காணிக்கையாக தரும் வளையல்களை அம்மனுக்கு சாற்றிவிட்டு பின்னர் அதை மங்கள பிரசாதமாக தருவார்கள். இதை அணிந்துக் கொண்டால்:
- திருமண பாக்கியம் உண்டாகும்.
- குழந்தை பாக்கியம் கிட்டும்.
- ஆரோக்கியம் மேம்படும்.
- செல்வ செழிப்பு உண்டாகும்.
- சகல நலன்களும், வளங்களும், நீங்காத செல்வமும் ஆண்டாள் அருளால் கிடைக்கும்.